【最佳拍檔】 周海媚自細有陰陽眼　爆電視城八廠女廁撞鬼好恐怖

TVB最近播出《降魔的》，相信大家話題可能會重提撞鬼經歷、鬼故。昨晚播出的訪談節目《最佳拍檔》，請來了林家棟與周海媚，講到在TVB的鬧鬼經歷。周海媚講起撞鬼，雙眼瞪得好大，講得好真實，看著電視都覺得有寒意。

周海媚講到見鬼經歷，她就自爆從小都可以見到靈界生物，小時未懂事直接跟母親講，都會被罵亂說話，長大後才驚覺自己有陰陽眼。後來，她在TVB工作，當時電視城還未搬到將軍澳時，經常傳出八廠好猛鬼，周海媚就講起在女廁的恐怖經歷：「當時入去，度度門都鎖咗，推唔開，因為係夜晚。終於有度門係開到，然後我用力一推之後，我見到個好肥嘅女人，抱住個BB餵奶，望住我…我就呆咗。之後冇講過任何嘢，就拔足狂奔跑到去服裝間，(諗起剛才)見到佢好嬲咁望住我，我就好驚。」

除了舊電視城的八廠，周海媚拍外景時都有見鬼經歷：「我記得有次喺龍蝦灣，當時拍緊《回到未嫁時》，定唔知係《今生無悔》，我唔記得咗。當時我就要走，有個梳頭姐姐就問導演可唔可以走先。我就有揸車，咁我就話好呀車埋佢。」當時大約凌晨四點，周圍都很靜，路上幾乎無人，可是周海媚開車到一段路時，有奇怪事情發生：「中間有一段路勉強可以兩架車擦身而過，我哋離遠就見到有人揸車入嚟，心諗咁夜都有人入嚟？可能返屋企。我就好細心咁睇架車係坐滿晒人，架車駛過去一刻，見到有個女仔伸個頭出嚟，對住我笑。」聽到都覺得不寒而慄，周海媚再仔細形容女子樣貌：「佢個咀好大，鮮紅色嘅。隻眼好似啲日本公仔，一條線咁，頭髮就係清湯掛面咁，對住我笑，我記得好清楚。」三更半夜見到鬼，個心一定嚇到離一離，周海媚隨後火速飛返屋企，至今難忘。

其後林家棟就解釋藝人半夜外景戲有休息時間，寧願閒聊都不願睡覺：「幾攰都好，都要係咁吹水唔瞓覺。因為驚瞓著咗，會有啲咩事發生，都咪話唔驚啊。」不過半夜不睡覺，遇到「奇怪物件」不是更恐怖嗎？那就不得而知了。