【降魔的】謝雪心做神婆好出色　親爆恐怖經歷好心寒：不能磨滅

《降魔的》出街只有幾天，暫時未算恐怖，但劇中演員在現實中，有過嚇到個心離一離的經歷，就係謝雪心（心姐）喇。她在劇裡飾演馬明的媽媽，是位緊張大師，錫仔仔錫到燶，每日都拜佛，總之就滿天神佛。跳出電視框，心姐是位佛教徒，講到撞鬼經歷，她最初就話：「心正自然靜，有疑心就會生暗鬼。」可是作為一個電視人，做過運動員，又演過大戲，或多或少都有過相關經歷，心姐於是就提起她跟粵劇大倌林家聲出埠做大戲的恐怖經歷。

心姐記得80年代時，上過《歡樂今宵》由周星馳做主持的「名人夜話」，分享過相關經歷，如今應該沒有record。心姐撞嘢時年紀小小，到馬來西亞表演大戲，就此開展了靈異經歷：「當時我就去馬來西亞做大戲，同行仲有林家聲，夜晚就返去酒店喇，就自己一個一間房。」人在外地，除了人生路不熟，第二件擔心的事，就是怕睡「生保床」，不過經過一番舟車勞頓，入酒店房第一件事就是入睡，可是當時心姐年紀還輕，沒有留意所謂的「入房守則」，沒有敲門告知「對方」，於是奇怪事情就發生了。「為咗啲戲服呀頭笠唔好皺，就攤晒出嚟。之後上床瞓覺，我住喺16、17樓，瞓瞓下聽到敲玻璃聲，越敲越大聲，心諗夜媽媽，我又住咁高，點會有人敲玻璃呢？我就唔敢擘大眼。」聽到如此怪聲，緊閉雙眼當然是自然反應，但都想知道發生甚麼，而敲玻璃聲越來越大之際，她感受到近窗邊的吊燈忽然搖晃，「我心諗冷氣開幾大，都唔會吹得郁盞燈，但真係越搖越勁。」心姐內心很緊張，於眼角偷偷望出窗邊：「我有擺啲戲服出嚟，見到有啲嘢就拎咗上嚟玩玩下，可能佢哋對啲粵劇有興趣，但係我之後驚到合返埋眼喇。」隨住窗外玻璃不停轟轟作響，心姐在荒亂之際想起一個辦法：「我就諗起一套日本鬼片，就係《無耳芳一》，就係講一個和尚成個身都係符，唯獨是得返一隻耳冇，用嚟聽鬼叫。」未知大家出遠門，有無親戚為保平安，會給一道符求個心安呢？心姐剛巧就有這道符，用作驅鬼：「我就打側瞓，就將道符擺咗係露出嚟隻耳度，慢慢就冇咗聲。」心姐過往都遇過不少疑似靈異經歷，但這次經歷她形容為「不能磨滅」。

心姐自此之後，不論去到哪裡，都很有「禮貌」：「唔好話酒店房，我就連去廁所，去TVB電視城入化妝間，都會敲咗門先，等『佢哋』可以有咗準備先。」雖然如此，但心姐其實並不迷信，沒特別相信甚麼風水命理：「其實屋企整齊就好，如果屋企亂糟糟，自己都會唔舒服喇，一切都要簡潔乾淨，咁就係好嘅風水，對自己都會有幫助。」心姐亦有養狗仔，有人講過動物都有感受靈異能力，有不對勁就會怪叫，心姐笑言狗仔沒有試過情況，最後再強調：「有時你覺得有啲嘢，都要當無，咁就真係無㗎喇。」一言而蔽之，唔好亂諗！咁就得喇！