【最佳拍檔】黎耀祥寸TVB收入低： 拍爛片人工和味過無綫
芷珊姐姐2012年憑清談節目《最佳男主角》在台慶頒獎禮獲最佳主持獎，當中訪問多位影帝級人馬相當有睇頭， 收視咁好當然要食過翻尋味，之後曾推出《最佳女主角》，而今年就推出《最佳拍檔》，顧名思義要請過往觀眾心中經典螢幕拍檔，昨晚第一集就請黎《巾幗梟雄》中嘅黎耀祥及鄧萃雯， 1997年已經憑《西遊記》角色豬八戒走紅嘅黎耀祥就因覺得自己停滯不前，決定離開TVB轉去拍電影，「正因為爛片無所謂，無人理你做成點，但嗰陣覺得幾好，第一有錢收，開幾日工(酬勞)亦好和味，好過TVB。」
入行初期大多數都係做配角嘅黎耀祥指，決心離開TVB嘅原因是因為仔仔剛出生，「我覺得係命中註定，當時我拍第二輯《西遊記》要到雲南拍外景，我嗰仔當時出世10日我就走，我喺度諗點解我個仔出世我都要走呢，做呢行係咪要放棄家庭呢？雖然豬八戒好似好多人留意，但無好大嘅進步，我係TVB 13年都係原地踏步，俾多次豬八戒我做都係咁。」
節目芷珊姐姐亦提到黎耀祥好鍾意換車，佢聞言後亦笑而不語並解釋金錢觀念唔強，「係唯一興趣同唯一可以享受到，你諗下我係TVB日拍夜拍，無時間出去食一餐好嘅，無時間去旅行同做任何嘢。唯一可以做嘅就係揸車，返工同收工都可以做嘅得返呢嗰。我係可以着一件T-shirt着10幾年，近年係因為工作需要先去買衫。」佢之後仲透露有10年無離開過香港，「做嘢登台就唔計，同屋企人去旅行都係近年嘅事，對上一次旅行已經係我嗰仔2歲嘅時候，你諗下我15年無旅行，所以大家話我成日換車，但我可以做啲咩，仲可以有咩興趣。」入行30年嘅黎耀祥就話TVB教識佢點樣去做人，「無人好似我咁行條演藝路，做 茄呢啡又幾年，有幾句對白又做幾年，有幾集戲又做幾年。我唔係一嚟就做戲，因為每個階段我都冷眼旁觀過幾年。」
至於19歲入行嘅鄧萃雯，同黎耀祥嘅人生簡直係相反，第一套劇《薛仁貴征東》就做女主角，收視仲要有60點。當年佢亦曾經離開TVB，到台灣及亞洲電視拍劇，「所以人係要出去見下外面，唔可以淨係匿喺度，有人話『魚唔過塘唔會肥』我覺得係好，因為去過唔同地方，比較過之後，你就會學識珍惜TVB有嘅嘢。」