【降魔的‧專訪】馬國明唔覺視帝返大陸易搵錢：上到去甚麼都不是

《降魔的》不經不覺今日已經來到第十集，被多套大製作台慶劇夾在中間，一直都不被看好，但出來的口碑和收視都尚算不錯，不少人力讚劇本有創意，演員演繹十分到位。講起演員，劇中的主角馬國明一向擁有觀眾緣，在此劇以貼地的形象出現更獲得大讚，有觀眾揚言馬明靠今套劇可以在年尾贏視帝！

觀眾們當然想馬明拎視帝，因為他入行十七年，做過那麼多深入民心的角色，但一次真正的視帝也未曾拿過，不過原來他並不是這樣想，在接受《香港01》訪問的時候，馬明說：「我不嬲拍嘢都唔係點諗獎，我成日都會諗返自己當初入TVB嘅初衷，到而家我都係鍾意做戲，做戲又唔係為咗攞獎。我每日開工我都好開心，可以做到唔同嘅角色，喺自己鍾意嘅範疇做嘢，又可以搵到錢，呢樣係最開心嘅嘢。獎我不嬲就唔係好諗，但可能好多網民成日話我灰足幾多年，呢啲係網民角度睇呢件事，咁我又唔介意嘅，我不嬲都唔鍾意澄清一啲嘢。舉個例子講返，幾年前AV嗰單嘢，佢問我有無睇過，我話無就呃你喇，三十幾歲點會無睇過，仲扮純情咩。但我亦都唔會去澄清，始終娛樂新聞嘛，大家開開心心咪得，又唔係犯法嘢。獎有係開心，但無嘅話唔會失望，始終獎項係要有啲緣份，同埋某啲因素，有無獎就隨遇而安喇。好似你喺馬來西亞或者新加坡攞獎，返到香港又未必有，因為個個market都唔同，正如吳京套電影喺大陸好勁，喺香港就普普通通。」還記得，在2012年憑《On Call 36小時》張一健（一件頭）一角爆紅，不過卻失落視帝，但宣布黎耀祥當選時，更露出呆樣，可能因為這樣，網民覺得TVB欠他一個視帝。

雖然自己不渴望獎項，不過今年頒獎禮他卻有一個心願，「今年我希望我演嘅劇集可以拎最佳劇集，無論《心理追兇 Mind Hunter》定《降魔的》，個劇本都係我自己好鍾意，我哋呢行成日講，一個演藝生涯遇到嘅好劇本唔會好多。亦都好坦白講，我做咗17年，我鍾意嘅劇本可能真係得四、五個，一隻手數得晒，難得今年有兩個我都係好鍾意，我好希望可以攞到最佳劇集。尤其是我成日覺得TVB無一個獎係俾監製同編劇，變咗唯一俾到佢哋嘅肯定就係最佳劇集，雖然咁多年有人上台攞獎都會同佢哋講多謝，但真係得句多謝囉，唯一一樣嘢可以放喺監製房就係最佳劇集，所以希望拎到喇。不過呢個希望都好難喇，今年太多大製作，我自己心知喇，呢兩套都唔係咩大製作，唯一可以做嘅嘢就係做多啲宣傳喇。（仲有咩係你鍾意嘅劇本？）《On Call 36小時》一定有份喇，不過唔講喇，唔好搞到其他劇唔係好劇咁，事實唔係咁，只係我個人喜歡啫。」其實馬明真的很替人設想，所以無論圈中或觀眾對他的評價都好高。

講起人緣，馬明都談及其實公司的藝人未必都像外界所想一樣勾心鬥角，即使當年陳展鵬拎視帝，個個起身唯獨他坐底，並不代表他們不和，其實私底下關係都不錯，他說：「啲人成日講到我哋一班藝人要鬥咁，好似鍾意王浩信就唔可以鍾意我咁，其實唔係，我哋其實大家都想大家好，有錢齊齊搵。好似之前展鵬買咗樓俾屋企人，我都有訊息俾佢恭喜佢，大家做呢行咁辛苦，一開劇又無得瞓，想點啫？其實都係想搵多啲錢，第時有個屋企舒舒服服，我又好，展鵬又好，未結婚架嘛，將來要娶老婆，現實啲都係要錢架嘛。其實大家都係想大家搵到錢，我而家喺大陸拍緊嘢，大陸一個橫店係有4、50組劇開緊，嗰啲街外錢嚟架嘛，大家去搵囉，唔通一個人拍得晒咩。良性競爭係會有，但唔會係惡性，大家搵到錢咪幾開心囉，有朝一日搵到錢，我同展鵬、浩信、蕭公子揸架靚車去下午茶，吹吓水，幾咁開心。」

錢對馬明是一樣現實的東西，如果拿到視帝，隨時可以北上搵大錢，究竟要視帝定要錢呢？馬明立即真性情，他說：「真係錢重要啲，我好坦白咁講，錢係重要啲。不過獎唔係唔好，獎對新人係好好，對佢哋真係有一個鼓勵，但對我哋呢啲做咗十幾年嘅人，尤其是我，好坦白咁講，我真係想要獎金多啲，因為始終將來要結婚生仔，有阿爸阿媽，係咪獎金實際啲呢，問我就係嘅。（視帝北上搵錢易啲喎？）我又好坦白咁講，其實就唔關事嘅。我終於明白點解祥仔（黎耀祥）佢早兩三年講過嘅一番說話，佢係視帝喇，佢話只係香港係視帝囉，返到內地就甚麼都不是，佢好坦白咁講。唔理你乜嘢視帝都好，你返到內地就要重新適應過一個新嘅market，你要知道個玩法，我而家都係開始接觸。」

下期專訪：會有馬國明講大陸拍劇的演員黑幕，還有他跟黃心穎的事，密切留意！