【使徒行者2】樂少天堂哥都是騙人的　前警司爆：邊有卧底咁搏命

《使徒行者2》今晚大結局，收視平均23點，國內點擊19億，加上網民反應（不論讚或彈），其實是成功的，雖然戲劇世界，創意無限，但據知有不少警隊中人就覺得劇情「得啖笑」，《香港01》訪問了前警司陳sir（不願透露真實身份），他表示劇情同現實有好大出入，尤其是卧底檔案為何這麼容易刪除，他說：「我哋睇真係笑到碌地，撳個掣就delete？你去人事部delete自己個file都未必得啦，吓話？仲要喺卧底咁重要喎，點會就咁撳幾個掣就得呢？其實卧底檔案係好機密，亦有多重保護，唔止一個，真係俾你咁叻仔去delete到一個又點？因為仲有一份喺律政司夾萬，即係袁國強度，你去delete俾我睇下？咁當然知係睇戲啦，但其實由《無間道》開始，都係撳個掣就得，編劇太求其喇。」所以現實中，不會因為有人delete咗一個卧底檔案就令人復不到職，亦不怕「卓sir」死了，就沒有人証明，因為檔案不止一個。

至於有幾多重檔案保護，陳sir雖然離職，但亦不願太詳細透露，但他表示卧底對警方破案是有非常重要作用，但現實中就沒有樂少、天堂哥這些賣命卧底，又殺壞人、又殺黑警，他說：「邊有卧底咁搏命呀？你做阿頭都以下屬安全優先啦，咁危險點叫人做？你俾幾錢人工呀？劇入面啲卧底做咁耐？真係冇人咁耐喎，冇人肯同你3年又3年啦，人哋打工咋，啲糧、假期點計呀？話俾你聽冇命你做唔做？梗係唔做啦，所以大部份卧底行動，都唔係咁戲劇化....危險性低行先，當然有危險嘅都有人做，但真係極少數。」

陳sir還表示警方卧底行動，有分大及小，小型那些根本很低風險，他說：「好似一啲放數集團，咪向房屋署攞兩個單位，跟住搵一男一女扮夫婦向呢啲財仔借錢，門口set晒cam，電話錄晒音，咁呢啲都係卧底行動嚟㗎，但風險好低，參與警員嘅安全你係控制到，至於handler係咪一定要去天台傾偈呢？咁梗係唔係啦，你成日去死個天台或者空地，你大佬都check你啦，而家又fb又ig，你又有家人、朋友、女朋友，好難全部清晒，人哋都唔係蠢㗎，同埋集團頭子，都做晒正行，你估仲好似陳豪咁，揸晒槍自己出面殺人販毒咩？愈有錢條命愈矜貴，你埋佢身都未必有料返，你都係埋啲中下層、或者小頭目先搵到食。」所以睇電視就唔使太認真，開心消磨了一個鐘就算。