【使徒行者2】「御用人質」宣萱爆監製臨時加脅持戲：我聽完都笑

見到宣萱你可能會諗起最近她在劇集《使徒行者2》飾演的Scarlett再度做人質，今午Jessica抱病出席「惜食堂」活動時透露都enjoy飾演人質，「我已經好接受，係呢方面都算係一個紀錄保持者。」

非正式統計顯示，宣萱今次又做人質，已經係第26次，究竟邊個咁大整蠱呢？宣萱透露當初《使徒行者2》是邊拍邊寫，「拍嗰陣咁啱有報道話我係『御用人質』，監製見到就話幾好笑，不如係劇入面加一段你又做人質喇，我聽完都笑就話：『你鍾意喇！』」提到今年有兩劇包括《不懂撒嬌的女人》及《使徒行者2》在身的她，飾演的「Mall姐」同「Scarlett」都深得觀眾歡心，更有網友指她是大熱視后，宣萱都話機會唔係無，「頒獎嘅嘢好難講，好多時都未必係大熱門攞，同埋我返嚟TVB拍劇都唔係為攞獎而拍，真係劇本吸引到我，從來收視同獎項都唔係我控制範圍之內。」

講到三哥苗僑偉日前就公開大讚黃翠如演技好，仲可以問鼎今屆視后，宣萱都有聽聞過，「我都覺得佢做得好好，都有讚佢。其實好多人都有機會，又有定欣同鮑姐，當然包括我自己喇。就睇下你好唔好彩。無聽過翠如因為咁樣而有壓力。」至於今年的計劃，她透露會先到內地工作，看來粉絲要等多一段時間先再係電視見到宣萱了。