【使徒行者2】最終臥底李焯寧係前御用丫鬟　轉職做OL網友嘆浪費

《使徒行者2》入面最後一個臥底終於自揭身份，雖然大家一早都已經估到，不過就未必估到梁斯敏（李焯寧飾）原來身份咁複雜。首先她以跨國洗黑錢集團成員的身份出現，之後原來係魏德信（陳豪飾）派佢入去做臥底，但昨日又講到去原來係黎Sir（張兆輝飾）派去魏德信身邊嘅臥底，幾重身份真係好混亂。不過見佢臨尾俾速龍（楊潮凱飾）拎住槍指住，同埋自己又末期癌症，相信佢好快都會死喇。

先唔理佢個角色有咩下場，好多網民喺佢出場之後就話佢好索，係劇中緊次Madam Cheung（蔣祖曼飾）的第二號索女，比起三位名氣較高的宣萱、黃翠如和麥明詩都更搶鏡，實在令人意想不到。其實如果各位觀眾有留意開TVB，相信唔難發現李焯寧(Karen)其實以前一直做一些跑龍套的角色，當年更是TVB的御用丫鬟。Karen在2000年畢業於無綫電視藝員訓練班，但係一直只是在公司浮浮沉沉，捱咗12年便毅然離開TVB，之後去過港視，拍過電影，試過讀書，做過marketing，直到《使徒行者2》大家先記得原來佢仲喺度。已經37歲的她其實完全睇唔出佢個年齡，依然保持得好好，剩係睇網民嘅反應就知道，相信如果佢想繼續幕前演出，一定會有返一班粉絲支持。