「坎坷電影」青年拍片的10種死法　「已講唔出口自己好鍾意拍嘢」

觀眾打開網站、走進戲院。看過電影，多少人會完整觀看片末的編、導、演職員名單？
4個行內年青電影人，從編劇到導演一條心，落泊中nothing to lose，要辦一個冇紅地氈冇星光燿燿、自嘲、圍爐、擁抱負能量的影展：「坎坷影展」。以為拍電影揮曬熱血青春，大學時「拼盡無悔」精神的尾巴兀自搖晃，殊不知入行幾年後，搞手自身最大的坎坷是，「講唔出口自己好鍾意拍嘢。」搞手之一的黃鐦（音：開）說。
說不出來，從畢業到入行幾年來，夢破碎的聲音是怎樣。

「Festival de Cannot坎坷影展」，「坎坷」源於康城的台灣譯名「坎城」；康城法文名Cannes變成「Cannot」。一個關於電影人「做唔到」的影展，不經意向首屆康城影展主席、發明電影的盧米埃兄弟開了個玩笑。

坎坷影展的大本營是黃鐦的廣告工作室。600呎空間，四台電腦仍有人忙着剪片、影碟櫃貼着「我要真普選」，擺滿數十隻邪典電影、色情漫畫。訪問途中，有入圍的短片導演到來受訪，訪問過搞手之後，輪到他們訪問導演。工作室外的走廊，是坎坷影展每段宣傳片的背景。

各種坎坷：片子長咗5分鐘被DQ、鬧學校也被DQ

黃鐦（阿鐦）、黃綺琳（Norris）、梅諾謙（阿謙）和呂榮棟（阿棟），入行5、6年後，想辦影展，睇睇其他同行拍片拍成點。廣告製作公司負責人阿鐦劈頭就說：「坎坷影展個名冇度過㗎，純粹係我之前拍過條片，要整道具證明角色參過咩影展，嗰時就將坎城惡搞做坎坷。冇大道理，冇光環，唔係推動業界制度改變，反而收片返嚟，我哋見到有唔少係幾出色，但就因為唔同原因，而失落其他影展。」

他們收到約100條參展影片。有大專畢業作品、獨立小本製作，中學生作品亦都有片交。標準是人棄我取，專收「失敗作」，「展示與成功有一段距離的短片作品」。還要導演交片時自述一段坎坷經歷。

填詞人、編劇Norris發現，有人因為作品片長比一些大影展要求超出5分鐘而慘遭「DQ」。有中學生拍片探討考試制度壓抑學生，拍完學校拒絕播出，亦拒絕蓋校印，令學生無法將短片送去其他影展。當講真話也會坎坷，她說：「唔少影展精英制，傾向表揚藝術成份高，完整度高嘅作品，想你講冠冕堂皇嘅嘢，青春、熱血、夢想等。但係失落嘅作品，都有付出過。」

審閱收來的短片、同時邀請導演或演員拍片自述經歷。一場互揭瘡疤的旅程，游學修話自己謝票時被職員誤當觀眾、岑珈其直頭話自己「我唔係演咗套戲，只係喺套戲度出現咗！」手機螢幕前的你在笑，他們也在苦笑，愈笑愈見疤痕。沒料到招致業內前輩批評「立心唔好」、「消費悲情」。他們幾個一於懶理。阿鐦反問：「點解唔係從佢哋嘅經歷中，發現呢行有好多進步空間？佢哋嘅坎坷係真實存在。好似中學生拍嗰條片，我自問中學生時代，唔會拍得比佢哋好。」

搞手真實坎坷：拍片拍到同人反面

做得坎坷影展搞手，他們4個入行以來的經歷，不輸給參展的一眾參展導演。搞手們正埋頭苦思說哪一段經歷好，梅諾謙身先士卒：「拍畢業作品拍到同人反面。因為大家都係學生，冇話邊個高邊個低。身為導演，我做嘅決定不時畀同學挑戰。佢地覺得大家出同樣錢、同樣辛苦，點解得你做導演可以落決定？」

這部畢業作品，當年還參加過鮮浪潮短片競賽，4萬元資助「拍衰咗一半」。但不參賽，學校本身不會資助學生拍攝。畢業之後，做過電視台助理編導，每日忙碌營役，沒有自己構思創作的空閒。一度麻木的意志，隨着自己企錯位，給導演發火往胸口轟來的一拳而醒來。

之後他辭職，做過4年中學校園電視台導師。離開了再回來，現在繼續做導演。他的畢業作品，至今可以在鮮浪潮網站找到。兩年助理編導加上4年中學教師的時間，29歲的他目標雖然有，怎樣前進卻是茫無頭緒。「就好似我知道自己要去西藏，但坐咩火車，邊度上車，邊度落車，我計劃唔到。」他說。

我愛公務員？►睹昔日教練天橋擺檔　悟興趣不能餬口：有錢才有夢

經理人暗示入行冇成就

除了稍為年輕、任電視台助理編導的阿棟外，Norris、阿謙、阿鐦快將「29+1」。Norris同樣參加過鮮浪潮，自編自導作品獲得最佳劇本。她記得獲獎時曾說過這樣一句話：「我覺得作為一個人，每年應該要交出一部短片。」

嘩，你人都不如啦。阿鐦指住Norris大笑。原來入行以後，她一直沒有新作品。幾年間她做過電視台編劇，和上司一起「圍度」劇本簡直瘋狂，不時早上10點開工，凌晨4點放工。月薪僅僅1萬5千元起跳。後來電視台不獲政府發牌，所有構思過的情節、人物永遠塵封倉底。唯有轉行當自由身工作。不過自由身工作保障低，有時接到「筍job」可賺多過2萬，有時就賦閒在家，等運到。

自由身面對的難題更多。試過客人看成品途中，突然要她用CG抹走牆壁上的一小塊污漬；又要求她拍出像《變型金剛》的CG水準。最難忘那次，是有客人要她「做假數」，虛報10倍拍片成本，幾萬變幾十萬。「我唔肯，佢就恐嚇我。最後傾唔掂數，片我拍好咗，但係推咗Job。」

兜兜轉轉，她現時為另一家電視台當編劇。有次拍劇與某個經理人閒聊，報過自己歲數後，經理人有點驚訝地「喔？」了一下。「之後她話，你都做幾鍾意呢行啵。好似暗示我入行幾年都冇成就。廿到尾仲做緊助理編劇。」

最大坎坷：技巧進步　創意消磨

幾個年青電影人的坎坷經歷，其實連電影大師也有同感。俄國導演塔可夫斯基曾說：「Cinema is an unhappy art as it depends on money.」一個錢字，拍戲不再隨心，少了快樂，多了坎坷。阿鐦一直希望正式執導筒，靠廣告製作公司接生意，終於在去年用12萬拍出一部短片，動用10個連攝影師和燈光師在內的攝製隊，全部都用「友情價」幫忙。業界編導職員的薪金沒有嚴格標準，友情價幾多，正價也不大知道要畀幾多。視乎幾多錢開戲，限米煮飯。「連埋後期，我班crew的時薪應該低過麥當勞。」

「好多導演會話，依家呢個時代有手機就可以拍到電影。唔係囉，我想拍到我心目中嘅標準，但為咗達到目標，我要儲更多錢。一路接Job拍片，同時見到身邊同行嘅人陸續有自己新作，發現佢哋拍得真係好好，反而我呢？我好似一直都冇進步過。講唔出口自己鍾意拍片。」他說。

「坎坷影展」揭露導演拍片坎坷事 場地的魚子醬過期也要被告上庭

Norris當過幾年自由身，收入不穩是日常。有時候，辛苦賺到的錢一下子都用來開戲，當然捨不得。可能是家用，可能是生活費。當你決定開拍一部戲，包括你在內的十幾個職員，便要每天花9小時拍一組約2至3場戲，劇本假設90分鐘，5分鐘一場，一日一組，需要投放20日高度集中精神拍攝。

生存在電影圈而又想有作品推出，除了自己儲錢，只能看有沒有電影公司賞識。「有公司搵過我構思電影，講到明冇任何限制，預算任寫，只係想我寫出一個屬於自己風格嘅故事。我一路諗佢既要求，一路諗，我竟然諗唔到。」她唯有婉拒電影公司合作。對方問她「係咪已經冇晒自己嘢？」

當不需要考慮怎樣服侍人客，不被他人要求，自己反而沒有信心踏出純粹的一步。「好矛盾。」她說。「好似入行幾年嚟，技巧進步咗，學到點樣應付唔同人唔同要求，但同一時間，意志同創意被消磨。」

繼續坎坷下去？

坎坷電影人辦坎坷影展，影展如果還有下一屆，再下一屆，是否意味香港電影圈繼續「坎坷」？阿鐦一臉輕鬆：「我唔知以後會點。只係覺得搞影展一路上都會瀨嘢，但唔會知瀨咗咩嘢。可能下年冇香港電影睇呢，一入戲院全部都係《建國大業》。」

坎坷是，他們為了實踐更遠大的夢想，卻一直遠離。他們奮力一跳，怎樣降落卻不想知道，也無法知道。