【英雄漫話】戰鬥用BGM點題又要勁 超級英雄電影配樂名曲回帶
講起超級英雄片配樂，大家影迷可能會覺得Christopher Nolan的蝙蝠俠三部曲的作曲人Hans Zimmer的恢宏創作是經典、是制高點所在。不過本文不是想講邊套戲的Original Score（原創配樂），因為邊套作得好真係好人言人殊好難比。唔通我話蜘蛛俠第一次Reboot嘅《驚世現新》同《決戰電魔》啲潮爆Dubstep電音好罕見、近年最鍾意最有印象係《奇異博士》的迷幻風印巴中東配樂，你又收貨？
《銀河守衛隊》主角星爵Star Lord聽Walkman大，因此電影收錄勁多7、80年代流行曲，甚至令美國卡式帶銷量有小陽春（因為電影配樂以卡式帶形式推出）。本文一定要寫，因為流行曲對超級英雄片電影故事描述上的影響，絕對係超重要。
Led Zeppelin - Immigrant Song（《雷神奇俠3：諸神黃昏》）
英國經典Hard Rock樂隊Led Zeppelins嘅《Immigrant Songs》真係用得遲，一早就出現喺《雷神》電影系列度，做Thor的主題曲。Robert Plant把高音狂野到首歌令人聽得幾High。無他，原曲歌詞正正就係講緊古代北歐的「戰鬥民族」維京人自斯堪地那維亞（主要係維威）之根據地西進搵新大陸落腳的「移民」傳奇。海盜為主嘅維京人，遷徙自然都係充滿霸道，BGM也不得不戰鬥格同張狂猛烈一點，跟以北歐神話為骨幹的《雷神》自然先天地夾。
其實首歌寫喺1970年夏天左右，當時Led Zeppelins正在巡迴演唱，前往冰島雷克雅未克過程一波三折最後卻玩得成，因此《Immigrant Songs》都暗喻他們浩浩蕩蕩但混亂無比的音樂征途。
不過事後孔明睇返，《雷神》頭兩集講苦大仇深的神話故仔，半古裝劇情調子較認真同沉悶；到第三集講北歐神話諸神黃昏和仙宮末日，再繼續嚴肅低沉落去就真係票房都一沉不起，因此Marvel搵來Cult爆喜劇《低俗殭屍玩出征》導演Taika David Waititi來把原故事拍返好笑一些輕鬆一些，加上加入了《銀河守護者》的宏大太空舞台，熱鬧的《Immigrant Songs》都叫出得合時，音樂一響超Epic，簡直帶起成套戲戰鬥氣氛，將成個系列起死回生。
Black Sabbath - Iron Man（《鐵甲奇俠》（2008））
AC/DC - Shoot to Thrill（《鐵甲奇俠2》（2010））
Iron Man又點可以無《Iron Man》？世上最邪門Rock Band之一的Black Sabbath同頭先所講的Led Zeppelins同代，都係對重金屬音樂影響深遠的英國搖滾樂隊，第二隻碟《Paranoid》首首歌都係經典（DC的《自殺特攻：超能暴隊》就在劈友場面用上快歌《Paranoid》了），《Iron Man》個超洗腦Doom Metal Riff就連唔聽Metal的人都一聽就認得。
但其實《Iron Man》係屬於最元祖最正宗Doom Metal歌，歌詞不是講Marvel的英雄Iron Man，係講一個完全無關的科幻悲劇故事：一個人（相信係科學家）穿越時空到未來世界，得知世界末日發生原因，回程途中因磁力場失控而變成半生不死的鐵人，完全郁唔到、被現代世界人類冷嘲熱諷，亦出不到聲，無法告知滅世緣由，全人類無法做準備防止而最終劫數難逃。不過半人半機械的身份，歌同美漫的Iron Man都是一致的。
《Iron Man》當年只出現在片尾End Credit，可能因為採用的版權費天價，畀音樂已經好甘，所以最後版本沒有Ozzy Osbourne的歌聲（好坦白，歌詞真是同Marvel的Iron Man無關）。2010年的《Iron Man 2》繼續Rock爆觀眾，電影、預告片同廣告都狂用澳洲Hard Rock殿堂級勁旅AC/DC的多曲名曲，當中最紅是開開心心的《Highway to Hell》及《Shoot to Thrill》，狂喜、浮誇而熱鬧的感覺啱晒花花公子有錢仔Tony Stark出席財大氣粗的公開場合用來做BGM，夠反叛夠串夠晒命。
蜘蛛俠永遠主題曲：Spider-Man Theme Song
Black Mountain -《Stay Free》
最初應用在1967年的《蜘蛛俠》卡通， 由奧斯卡配樂得主Paul Francis Webster同Robert "Bob" Harris所寫，可以話係歐美最家喻戶曉的兒歌之一。幾乎套套蜘蛛俠真人電影系列都有用，最新一集《強勢回歸》直頭用交響樂編曲；Punk樂隊The Ramones同Hard Rock樂隊Aerosmith都玩過，其中以The Ramones較紅。
另外記者對Tobey Maguire做Peter Parker的舊版三部曲《蜘蛛俠》第三集（都成十年前上映）的Soundtrack都幾深印象，因為堂堂荷里活巨製竟用上好多Indie Band的歌曲，好像澳洲的Wolfmother同北愛爾蘭的Snow Patrol。可能當時想討好後生觀眾吧（畢竟蜘蛛俠係賣青春味），其中加拿大迷幻團Black Mountain的《Stay Free》就超正。
麻煩友唱麻煩友：DMX - X Gon' Give It to Ya（《死侍：不死現身》（2016 ））
Deadpool絕對係美漫超級英雄裡面最黐線同搞笑的，本來係針對DC反派「喪鐘」Deathstroke的「二創人物」。最先喺《X-Men》登場、實驗產生而又有不老不死身的前特種兵，Deadpool（Wade Wilson）因為頭腦長時間處於精神混亂，因此變成行事乖張失常、亦正亦邪的反英雄，煩膠無比又口臭、經常噏廿四仲突破第四牆同讀者講嘢，成日同Spider-Man互串，同Cable又係歡喜冤家。
電影版Ryan Reynolds演繹徹底正宗還原（漫畫本來就係話Deadpool個樣十足Ryan Reynolds，而演員亦喺2009年的《狼人外傳》已做過Deadpool真身Wade Wilson），套戲必然喜劇向好好笑，用上大量流行曲，包括已故歌手George Michael的《Careless Whisper》。
其中預告片已經應用的《X Gon' Give it to Ya》，主唱者美國東岸Rapper DMX（真名Earl Simmons）本身跟Deadpool一樣都是十足十的麻煩友，曾因藏毒、醉駕等事件被逮捕13次、入獄6次，同時卻史上第一位創下「連續推出5張專輯，5張均取得Billboard 200排行榜冠軍」紀錄的藝人，麻煩友唱麻煩歌襯晒麻煩英雄，DMX傳奇可詳見舊文介紹。
灰暗絕望之選
The Smashing Pumpkins - The End is the Beginning is the End （《保衛奇俠》（2009））
John Cash - Hurt （Nine Inch Nails Cover）（《盧根》（2017））
2009年上映的「另類」超級英雄片《保衛奇俠》應該都算同類型中最黑暗之作（拍得上早一年的《黑夜之神》）， 這由Alan Moore原作的DC漫畫曾榮獲雨果科幻文學獎，以架空時空的80年代冷戰、核危機的反烏托邦為背景，共和黨總統尼克遜沒有因水門事件下台，而是不斷連任，因此美國也成為威權專制政府，跟另一專制極權蘇聯對峙，社會日趨禮崩樂壞，民眾人人自危，不再相信超級英雄。主角是一眾充滿性格弱點同黑暗面的美國超級英雄，他們接二連三被殺和被襲，背後自有重大陰謀。高質的推理同驚慄橋段，加上鮮明角色性格和內心掙扎的深度描寫（完美英雄不存在，正義之脆弱，拯救世界的手段取捨方面道德上之困難），對政治同人性的刻畫入木三分，難怪成為美漫迷共同推薦的神級夢幻作。
可以預期電影基調有幾灰暗，Zack Snyder拍出漫畫的沉重壓抑氛圍，人人都唔開心，略為改寫的結局更慘更有餘韻，可惜當年毀譽參半、票房表演亦麻麻。多首灰歌如Emo的My Chemical Romance《Desolation Row》、Simon & Garfunkel孤寂愁緒的《The Sound of Silence》同「輓歌」Leonard Cohen《Hallelujah》都出現。不過記者個人最鍾意只聞於預告片的The Smashing Pumpkins《The End is the Beginning is the End is the Beginning》，是《The End is the Beginning is the End》（原曲較輕快，恰好是1997年《蝙蝠俠與羅賓》主題曲）的暗黑電音Remix版，厭世自嘲、頌揚黑暗虛無的歌詞加上工業電子同Darkwave特有的低迷 ... 英雄就算以瞞天騙局阻止了滅世，仍無法消除世間不義，同自身正義的缺陷。
今年的《盧根》係Hugh Jackman最後扮演X-Men骨幹狼人的作品，充滿告別意味。故事又係講變種人被追殺殆盡的絕望未來，狼人老化失去不死自癒能力，仲要推住老人痴呆的X教授著草隱居。咁灰咁無生機的背景，預告就用了John Cash翻唱美國工業金屬樂隊Nine Inch Nails的《Hurt》 來直接傳達畀觀眾。Cover紅過原唱的例子不少，《Hurt》相信是其中之一，Trent Reznor有點Emo的歌詞在John Cash滄桑歌聲同木結他演繹，像老人晚年對前半生的沉痛省悟，個Feel出晒，極度催淚。