【01博客咁睇波】陪你估波（持續更新）

四年容易又歐國，唔知今屆大家嘅心水又係邊幾隊？
今次決賽周有成24隊，令唔少新丁都取得入場券，佢哋會如何左右賽情？
唔講唔覺，原來講開球評的01博客，坐坐埋埋有一枱！
呢次唔係圍爐取暖喇，而係圍爐取波經，就請班博客陪下大家講波兼估波，順便為大家深入又淺出咁，了解埋參賽國踢波以外的其他！

【2016 年 7 月 11 日更新】

2016 年歐洲國家盃終於完滿結束。覺得佢實至名歸又好，行運行到腳趾尾也好，都無法改變 C 朗成功帶領葡萄牙喺東道主法國手中捧走冠軍獎盃嘅事實（雖則佢喺 25 分鐘已傷出……）唔知同人唔同命、一直喺美洲盃有精彩表現，但去到決賽先飲恨嘅美斯睇到，又有乜嘢感受？

01博評 x 01Sports 嘅估波遊戲同樣塵埃落定，由一直以精密分析準確預測十六強出線名單同多場賽果嘅馬嶽教授成為今屆嘅「估波王」！雖然因為德國嘅失利，令佢喺尾段有被反超前之危，但最終仍憑住獨到眼光，睇出葡萄牙戰術足以捧盃嘅優勢，成功喺絕大部分博客都買法國奪冠之際，押注喺葡萄牙身上，「估波王」嘅頭銜絕對當之無愧！

冠軍福利，不如一齊重溫下呢位「估波王」喺今屆歐國盃嘅精彩球評吧！

【先為不可勝 以待敵之可勝 葡萄牙有機奪冠】（2016-07-06）
【焦點之戰！德意大戰的懸念】（2016-07-02）
【意西大戰，意大利戰術克制西班牙】（2016-06-27）
【零球星意大利 反令人眼前一亮】（2016-06-14）
【法國有隱憂 皮耶救全家】（2016-06-11）

歐國盃已落幕，但其實 01博評 除咗足球，仲有大把 NBA 以至其他運動嘅精彩評論，更有唔少從文化、歷史或政治角度去暢談各運動項目或參賽國嘅有趣文章，請繼續多多支持！

當然，要睇最新賽果、分析同最圖文並茂嘅體育新聞及豐富資訊，就要多啲去 01Sports 嘅地頭逛下哪！（按此進入）

【2016 年 7 月 9 日更新】

唔經唔覺，話咁快就嚟到決賽，由唔少人覺得表現平平、甚至「冇資格」打入決賽嘅葡萄牙，挑戰今屆東道主法國。又難怪嘅，之前葡軍以打 5 場和 5 場嘅成績（法定時間內），依然入到四強，自然備受質疑。不過我哋有博客就唔係咁睇，仲指出世人都誤會咗葡萄牙嘅戰術咁話，睇睇佢哋點講？

【馬嶽：先為不可勝　以待敵之可勝　葡萄牙有機奪冠】
【世界波：葡軍一隊豬隊友？其實只因C朗】

喺「歐洲最強」快將誕生之際，我哋今次嘅估波遊戲亦同樣進入白熱化階段！由於德國喺關鍵一戰落敗，令一直領先嘅馬嶽有機會喺最後先畀人反超前，而唯一有可能反敗為勝嘅居然係……波三痴！乜波三痴唔係一直包尾㗎咩？呢條友唔係淨係識講波衫㗎咩？冇錯，呢位超級球衣收藏家最初估波表現確係麻麻，但由於全世界只有佢一個喺一開始就買法國捧盃，所以亦只有佢有機會憑住估中冠軍嗰 5 分超越馬教授（見下表），上演一場絕地反撲戰，十足十今屆一眾新丁黑馬令人刮目相看嘅表現！（雖然啲新丁黑馬已全軍覆沒……）

唔知大家又係「Anyone But C朗」，還是「葡萄牙的好你不懂」？葡軍對法軍，你撐邊隊？馬嶽又會否臨門一腳畀波三痴反超前？7 月 11 日，巴黎法蘭西體育場一決雌雄！（夜得滯睇唔到的話，記住嚟 01Sports 個歐國盃專頁睇返精彩回顧同分析！）

01博客估波積分排行榜：

【2016 年 7 月 6 日更新】

終於嚟到準決賽！雖則今屆有唔少悶戰（多謝葡萄牙），但亦有令人眼前一亮嘅精彩賽事同隊伍，包括輸人唔輸陣嘅冰島以及童話故事仍未終結嘅威爾斯。

【世界波：葡軍一隊豬隊友？其實只因C朗】
【運動公社：冰島之勝 踢英式足球踢贏英格蘭】

不過講到四強焦點對決，自然係 7 月 8 日凌晨開波嘅 德國 vs 法國。估波遊戲來到尾聲，依然由馬嶽教授領先，而且由於緊隨其後嘅李聲揚估攞冠軍嘅克羅地亞早已出局，但馬教授隊德國仍然「在生」，所以李氏想反超前都唔易。反而稍為落後嘅 01Sports 同 波三痴，由於心水隊伍（威爾斯同法國）仍然有機奪冠，故比其他同樣揀德國嘅博客（如廖詩颺）更有機會反敗為勝。

所以呢場波三痴諗都唔使諗，一定係買法國晉級，另外捧法國嘅仲有李聲揚、01Sports 同撒拉夫，幾乎都係較有機會追上馬教授嘅博客，自然要同佢唱對台。唔知東道主法國能否延續上仗嘅氣勢，如佢哋所願，終結德國嘅冠軍夢？

01博客估波積分排行榜：

【2016 年 6 月 30 日更新】

2016歐國盃終於踢到八強階段，雖然冰島嘅童話故事值得期待，威爾斯亦愈嚟愈多捧場客，但講到最萬眾矚目嘅賽事，自然係 德國 vs 意大利！

【運動公社：冰島之勝 踢英式足球踢贏英格蘭】
【運動公社：百年實力最接近 威爾斯：到我做大佬！】

純以往績論，意大利絕對係德國嘅超級剋星：兩隊對賽 33 次，德國只贏過 8 次；假如只計歐國盃呢類大型賽事（非友誼賽），德國更係 1 次都冇贏過意軍！唔知今次路維又能否再度逢凶化吉，憑呢一戰打破宿命？

【蔡子強寫在大戰前：德國從未贏過意大利！】

睇返上圖班博客同體育組嘅預測，可謂德意兩隊各有捧場客，但值得留意嘅係馬嶽雖然之前明明估德國攞冠軍，但呢場又買意大利晉級，係咪有啲矛盾？所以話少年你太年輕了，只要睇返之前個估波遊戲積分榜，就知道佢呢場捧意大利，反而有買保險之奇效，因為不論德國最終捧盃或今場意大利晉級，都有較大機會可保持榜首位置！

不過馬教授亦確實頗欣賞今屆意大利嘅表現，睇睇佢點講：
《意西大戰，意大利戰術克制西班牙》
《零球星意大利 反令人眼前一亮》

睇埋其他博客點分析今次嘅德國隊：
《李聲揚：逢凶化吉 成就路維巧威威心理》
《世界波：德國要自我救贖，靠重拾鐵血意志》

【2016 年 6 月 28 日更新】

今晨兩場矛盾大戰，雙雙由較冷門嘅隊伍勝出。首先係歷史上第一次打入歐國決賽周嘅冰島，雖然開波冇耐就被鶴臣愛將朗尼以 12 碼先開紀錄，但冰島話咁快就憑納拿施古臣一記門前接應成功追平，後來更反敗為勝以 2：1 foul 走三獅軍團，搞到鶴臣都要引咎辭職，而冰島亦再創歷史，首次殺入歐國盃八強！

【運動公社：冰島之勝：踢英式足球踢贏英格蘭】
【撒拉夫：鶴臣揀人，似你老細請人】
【廖詩颺：三獅雙鷹歪十字？教你從符號睇歐國！】

至於我哋班博客都有份估嘅另一場 意大利 vs 西班牙，就由意國上下半場各入一球以 2：0 技術性擊倒上屆冠軍，亦報咗上次決賽慘被大炒四蛋之仇！估波遊戲一直由「講波教授」馬嶽同自稱搵到「估波必勝法」嘅財金專家李聲揚叮噹馬頭，長期並列積分榜榜首，但由於馬Sir一直睇好嘅意大利今次爭返啖氣，所以令佢稍為領先，而同屬少數估中今場賽果嘅波三痴亦憑呢場拉返近同大家嘅距離。

唔好話馬後炮，不如睇睇馬嶽賽前點解對意軍睇高一線：《意西大戰，意大利戰術克制西班牙》

【2016 年 6 月 27 日更新】

萬眾期待嘅 意大利 vs 西班牙 一戰，即將喺今晚半夜 12 點開波。4 年前西班牙就因為分組賽冇放水（或「唔小心」贏咗波啦），令到意大利死裏逃生，仲過關斬將殺埋入決賽，但最終都畀西班牙大炒四蛋，無緣捧盃。

今次西班牙就調返轉，喺分組賽最後一場放水放過頭，輸俾克羅地亞，失去小組首名位置，搞到自己淘汰賽第一場就要硬撼意大利，令 4 年前歐國決賽嘅戲碼提前上演。

意大利起初雖然不被睇好，但後來卻以實力證明咗「平民球員」只要有默契一樣可以撼贏「明星球隊」嘅道理（代表作自然係「爆冷」勝比利時一役）。今晚呢場矛盾大戰，大部分博客就依然睇好上屆冠軍，未知意國又能否再次發揮唔畀人睇死嘅精神，一報一箭之仇？

【2016 年 6 月 24 日更新】

終於嚟到淘汰賽階段，是時候估邊隊最有機會捧盃了。現階段估冠軍，等於要喺未確定之後對手嘅情況下連續估中 4 場，畀估中冠軍嘅博客加 5 分都好合理吧？亦有機會畀暫時落後嘅博客憑一次獨到眼光追返上榜首，例如得佢一個揀法國嘅波三痴（佢啱啱落後榜首 5 分……）

睇返上圖，連克羅地亞、威爾斯都有人押注，會唔會進取咗啲？但若估西法英德意，由於全部處於「死亡下線」，一樣唔易押中！馬嶽、廖詩颺、丹尼爾揀德國，李聲揚同世界波撐克羅地亞，我哋體育組 01Sports 最夠薑，支持威爾斯！呢次班博客嘅心水幾乎全部都唔同，到底邊個眼光最準？

不如先總結下截至目前為止大家嘅估波成績吧！

【2016 年 6 月 22 日更新】

分組賽陪你估波最後一擊，雖則部分博客已預咗提前出線嘅西班牙唔會去盡，但依然冇估到佢會直頭輸埋，只能以次名出線，令佢淘汰賽第一場就要硬撼今屆冇乜球星但依然打出水準嘅意大利，亦意味住呢兩隊上屆成功殺入歐國盃決賽並分別成為冠亞軍嘅強隊，肯定有一隊無法躋身八強之列，到底最後會鹿死誰手？意大利又能否一報上屆被狂數四蛋之仇？

【馬嶽：零球星意大利　反令人眼前一亮】

趁淘汰賽未開波，不如一齊重溫下班博客嘅「另類」睇波角度？

【2016 年 6 月 20 日更新】

今早 瑞士vs法國 一場，雖以 0:0 和氣收場，雙方攜手出線（法國就踢之前已出咗線啦），但查實場波都未算太悶，上半場打唔夠一半已有唔少驚險場面，尤其普巴狀態回勇，射完一腳又一腳，其中一球遠射更僅中橫眉彈出，可惜雙方都似乎欠點運氣，鬥至下半場雖仍有幾個具威脅嘅攻勢出現，但始終無法破網。

回看今次大家嘅預測，除咗馬嶽、李聲揚同丹尼爾外，體育組嘅同事 01Sports 都順利估中，其中李聲揚 4 場已估中 3 場，果然不失其市場策略師嘅威名，睇個市同睇波一樣咁準。

【李聲揚：比馬會更準的估波必勝法】

嚟到分組賽嘅尾聲，仲有邊場值得叫班博客估？唔使諗，一定係 克羅地亞 vs 西班牙！睇開波嘅球迷應已發覺，如今 D 組嘅格局，幾乎係 4 年前歐國盃嘅翻版：西班牙已提前出線；最後一場又係對克羅地亞；兩隊只要打場「默契波」戰平已足以雙雙出線……

不過咁，4 年前西班牙如果畀克羅地亞出線，就可以踢走同組嘅強敵意大利，誘因比今次更大，但最後都係「忍唔住」入咗一粒 foul 走對手，搞到自己總決賽要對返意國（雖則最後狂數 4 球大勝捧盃啦。）到底今年佢哋會歷史重演，發揮「贏咗先算」嘅精神，還是響應克羅地亞嘅拿傑迪錫早前所講，「和波對雙方都有好處」呢？

買定離手，一班博客就估咗喇，你又會點估西班牙今次嘅決定？

【2016 年 6 月 17 日更新】

噚晚紅龍軍團硬撼三獅一戰，由大聖爺巴利為威記先開紀錄，令唔少睇死今屆英格蘭狀態不濟嘅球迷心諗「預咗㗎啦」，到下半場鶴臣果斷大膽嘅換人決定，再到一班英超球星愈戰愈勇打出水準，最後成功攻破全力死守嘅敵軍，峰迴路轉反敗為勝，大家又覺得呢場波好唔好睇先？

睇返班博客同01Sports嘅預測，大部分都有驚無險地估中英格蘭勝（除咗對鶴臣用人哲學非常有意見嘅撒拉夫、睇好威爾斯嘅運動公社，同買和嘅丹尼爾啦。）

下場又叫佢哋估乜好呢？一於高難度少少，6 月 20 日凌晨 3 點嗰場 瑞士 vs 法國 如何？心水清嘅都知道，呢種波先至最難估，因為早前兩場法國已攞足 6 分提早出線，所以要估呢場唔可以單睇兩隊實力同狀態，仲要諗埋佢哋會留幾多力同有乜嘢策略性考慮。最麻煩嘅係，查實瑞士一樣幾乎篤定可入到十六強（就算輸呢場都極大機會可成為 4 隊最佳第 3 名之一。）

上圖可見，包括馬嶽、李聲揚同體育組等等，今場都估開和，但就仍然冇人覺得瑞士會贏波。唔知各位球迷又會點預測？

【2016年6月15日更新】

英威大戰聽晚開波，仲要係香港時間 9 點就有得睇，啱晒星期五仲要返工嘅打工仔女（但 hardcore 球迷要睇埋德國對波蘭就冇得講啦。）

雖則今次英格蘭領隊鶴臣嘅用人哲學備受質疑，上場對俄羅斯仲要補時先嚟甩轆，臨尾慘被追平，白白攞少兩分，但同威爾斯相比，點計都高對手幾班，加上仍需落力爭出線，所以大部分博客都買佢全取 3 分，只有撒拉夫同運動公社估威爾斯有機會以弱勝強，扳倒三獅軍團，未知會否如佢哋所願爆大冷？

絕非亂估，不如睇下撒拉夫點解睇死鶴臣麾下嘅英格蘭冇運行：《鶴臣揀人，似你老細請人》

睇埋運動公社點解咁睇好今年嘅紅龍軍團：《百年實力最接近　威爾斯：到我做大佬！》

【2016年6月14日更新】

當全世界將我睇死，我更加要爭返啖氣！莫講話街外人同我哋一班博客唔睇好今屆歐國盃嘅意大利，就連意大利自己國內嘅媒體都狠批佢哋呢次國家隊嘅陣容可謂史上最冇眼睇。

但乜嘢青黃不接，乜嘢中場大將缺陣都係假，呢隊傳統勁旅依然成功憑基亞卓尼利同柏利上下半場兩個靚入球，爆冷以 0:2 擊敗世界排名第 2 嘅比利時。當然有份助攻嘅邦路斯同簡達華亦功不可沒，但最抵讚嘅就肯定係意軍嘅穩健後防（尤其同比利時相比啦下。）不如聽下兩位博客點講呢場波：

【比利時篇】撒拉夫《勝利需要一支球隊，而非十一位球星》

【意大利篇】馬嶽《零球星意大利　反令人眼前一亮》

嗱，睇返上次成班博客同體育組嘅預測，雖則估中嘅人數係……零！但查實大部分都估開和，可謂對意大利有一定信心，都唔算錯得太離譜啦。下場我哋揀畀班博客估嘅就輪到有唔少香港粉絲嘅英格蘭同威爾斯一戰，唔知大家今次又會點預測？

【2016年6月12日更新】

上次開幕戰果然由東道主法國旗開得勝，全取 3 分，大家要估中自然毫無難度。第二場要班博客估嘅就輪到 6 月 14 日凌晨 3 點開波嘅 比利時 vs 意大利，兩隊實力差距較接近，班博客嘅預測結果應該冇咁一面倒啦？

查實睇開波都知比利時世界排名早已大幅拋離意大利，亦係一致公認嘅 E 組最強隊伍，所以意國雖然係上屆亞軍，但今次被編入「死亡之組」，莫講話以首次名身分出線，我哋 01Sports 嘅同事直頭估佢連十六強都入唔到！

不過正所謂爛船都有三斤釘，所以今場雖然全部博客都估佢贏唔到，但 9 個之中仍有 6 個買佢有力逼和有「歐洲紅魔」之稱嘅強勁對手。班博客對你咁有信心，迪羅斯一於帶領班新力軍踢場好波嚟睇下吧！

【2016年6月9日更新】

歐國仲有唔夠兩日就開波，呢刻焦點梗係開幕戰，今屆大熱門之一兼東道主法國 vs 傳統勁旅羅馬尼亞，大家估下咁多位01博客點估？

九個博客，四個估羅馬尼亞出唔到線（仲要係同組有阿爾巴尼亞嘅情況下……）。都明嘅，雖然羅馬尼亞係世界盃同歐國常客，喺2000年歐國仲有超水準表現，但近年始終狀態一般。

至於開幕戰，也是幾乎一面倒估羅馬尼亞輸，除咗佢：波三痴！買和。唔知會唔會眾人皆醉佢獨醒先？（正所謂波衫的世界你不懂！）

【歐國盃最新動態、分析及球評，盡在 01博客 x 01Sports 歐國盃專頁！（按此進入）】

【2016年6月1日更新】

24 隊波，16隊出線，意味住今屆歐國決賽周唔止新丁多，而且幾乎必定有歷史上初次殺入淘汰賽嘅隊伍。所以今次大家都話要估邊隊出唔到線，仲難過估邊隊出到！

好喇，講咁耐，今次有份圍爐陪大家估波嘅，究竟有邊位博客呢？

球評派，有馬嶽、丹尼爾、波三痴、運動公社；加兩個足球發燒友先，就係李聲揚同廖詩颺；新博客派，有新加入嘅撒拉夫同世界波；喂咪住，01 Sports（我哋專業嘅體育組同事）跑過嚟話咁好玩熱鬧，點解唔預佢哋一份。梗係預啦！

就係咁， 01博評 ９人估波團，成團！

當估波熱身賽，以下係呢 9 個單位嘅十六強預測，正所謂隊隊有份，永不落空，睇下大家又 buy 唔 buy？

一如所料，法德西比係今屆大熱，深受博客們睇好。雖然唔少港人喜愛嘅英格蘭一樣有 9 票，但由於有博客覺得佢只能以最佳第三名身分出線，所以同葡萄牙一齊屈居第二。

慘被分入「死亡之組」（同其他組相比啦下）嘅意大利，唔止有兩位博客估佢完全出唔到線，其餘過半數都係買佢頂多以第三名出線，所以排名仲低過冰島。

反而北愛雖然只有 3 人估佢入到十六強，但 3 個都係估佢可以首次名出線，認真有信心。

最後，同為歐國盃新丁嘅阿爾巴尼亞，雖然世界排名係 24 隊中最低，但仍有兩位捧場客，其中一位正係出名熱愛東歐嘅李聲揚。不如聽聽佢點睇呢隊捧盃賠率有成 300 倍嘅超級冷門：《東歐新丁看點：有睡褲門神，又有兄弟相殘》