【風災過後】沙田基督書院學生自發清理屋邨垃圾　街坊激讚

雖然超強颱風山竹為香港帶來大量破壞，但同時亦讓我們看到人間有情，不少市民發起義載、自發清理區内的垃圾等行動，幫助其他人。而沙田基督書院學生就自發收拾學校垃圾，以及清潔社區，獲街坊大讚。

「其實博康邨好多樹，以前好似成個森林咁，所以今次打風好大鑊！雖然我無仔細數，但應該冧咗超過100棵樹。」當區區議員趙柱幫表示，颱風吹襲香港後，博康邨受災相當嚴重，因多棵大樹倒下，多條行人通道被擋。恰好星期一二，全港中小學停課2天，沙田基督書院30多個中學生就趁此機會自發清潔位於博康邨的校舍，以及執拾邨内遍地的垃圾和樹枝。

趙柱幫大讚這班同學是他見過最樂於服務社區的學生：「我真係好感動，佢哋成班學生大約有30、40個人，初中到高form都有。星期一早上10點左右已經喺邨内打掃，執足2日，先清理自己學校，再行去邨内各個行人通道同大牌檔，主要掃垃圾同執開啲樹枝，等行人可以過到。其實星期一市面咁混亂，我都唔知佢哋點過嚟，好佩服大家。」

他又指，不少街坊和管理公司職員看到學生如此落力，紛紛為他們送上勞工手套、掃把之類等工具，又有其他街坊加入參與打掃行動。基本上第一日已經清理了阻擋大部份主要通道的樹枝，趙柱幫其後在網上和其他市民分享此好人好事，大家紛紛留言：「真乖，值得一讚。」亦有人為沙田有這些學生而感到驕傲。