【社區小小事．多圖】高手在民間　港媽手造微縮街市幾可亂真

微型藝術近年在香港甚受歡迎，今年年初有多個商場舉辦了微型藝術展，日本微縮大師田中達也來港，亦有本地微型藝術家到外地擺展覽。不過「高手在民間」， 美孚也有一名全職港媽，多年前因「陀住個女想搵啲細藝」，20年來半自學製作各式各樣的微縮模型。她近日完成街市系列的微縮，不論是海鮮檔中的魚蝦蟹還是海味店中鮑參翅肚，其細緻程度幾可亂真！
攝影：羅國輝

「人始終需要搵個嗜好，搵啲嘢去寄託。」育有兩女的Sandy，現時為全職主婦，平日除了「湊女」，也會在家中製作微縮模型和開班教學生。別看她手捏黏土時不匆不忙，很有耐性，其實她的人生曾經也和其他上班族一樣，過得匆匆忙忙。Sandy表示，過去她在中學任職數學老師，有一份穩定收入和優厚福利，但做了數年，漸漸覺得生活日日如是，某日赫然發現「人生唔可以咁過」，「諗到以後10年、20年都係繼續咁過，我嗰刻覺得唔可以一直係咁。」

就是天份高

於是她毅然辭職，自己做老闆開設教育中心，但工作反而更加忙碌，不時要四處奔走。直至她懷上女兒，休養期間「搵嘢學」，開始了製作微型黏土，「大概19年前，大肚時想搵啲靜態嘢學，第一次接觸咗整黏土，當時其實係好皮毛......整整下見都幾有興趣，就再跟兩個老師學咗年幾，覺得自己都算有天份，觀察力都強喎，就自己繼續整，一整就整到依家。」其後幼女出生，為了照顧她們，Sandy索性放棄事業，留在家中。小時候受家中資源所限，並沒多做手工；長大後忙於工作，偶然之下才發現自己的藝術天份，由事業型女性變成全職媽媽，微型藝術帶來的滿足感功不可沒：

「每樣嘢由零開始，嚿粉本身冇顏色，由你畀顏色佢，又要諗下點樣做個質感出嚟係似嗰樣嘢，最後又再上色，然後再設計一個場景將啲嘢砌埋一齊，過程係幾好玩，同埋人人見到都話：『嘩好靚呀好得意』，其實會好開心。」

要以假亂真

Sandy的街市系列模型共有4檔：魚檔、海鮮檔、生果檔和海味檔，每檔放滿密密麻麻的貨物，每一「粒」貨物不論是顏色、質感和外表都十分像真，原來每檔都需耗上數月才能完成，檔中「粒粒皆辛苦」，貨物全由Sandy親手製作，「譬如整海鮮檔，一開始係逐條逐條魚咁去諗，魷魚要點整先會好似好軟，又有少少透明？又譬如魚檔，個魚卜望落去好似空心好輕，但其實佢係實心，好玩就係呢樣嘢。」

她示範了用黏土製作花菇、鹹魚，期間除了一般的搓揉篤捏，還包括了火燒、風乾和烤焗，「因為主要都係用黏土整，個難度在於點樣用手上材料、顏色去做相似嘅質感。」Sandy指，除了要熟悉每種黏土的特性，製作微縮更要具備觀察力。如生果檔中，除了一般的蘋果橙，她更會加入諸如香印提子等近年才興起的時令水果。雖然街市造型維肖維妙，但Sandy原來並非日日行街市,「依家買餸多數都係手機撳撳撳然後送上門，我整海味檔，但其實唔係好清楚花膠鮑魚幾多錢一斤，都係上網搵圖片做參考！」

找到滿足感

除了街市檔微縮之外，她過往亦曾替人製作「過大禮」模型予人作送禮之用，精心製作，卻只售1000多元。「收多收少都無所謂，製作時我自己都開心。」

Sandy兩個女兒現在分別12歲和18歲，全職做微縮媽媽多年，與過去的日子相比又有甚麼不同？「以前返工真係好忙，忙到有時可能連食飯時間都冇，忙有忙嘅滿足感，但就真係冇時間做創作。反而𠵱家就可以整一啲真係屬於自己嘅嘢。」家人又是否支持她製作微縮模型？「可能我真的做了成10幾20年，我個女由一出世就見到呢啲嘢，唔覺得好特別，覺得世界上好似係人都識得整㗎啦......不過只要我開心，佢哋都一定支持我繼續整。」

如想看到更多作品相片，可瀏覽Sandy的Facebook專頁：Sandy Crafts