【社區熱話】英國阿婆街上握風筒扮測速儀　射住飛車黨保衛社區！

英國諾丁漢（Nottingham）最近超速問題嚴重，甚至有人在市中心騎著四輪電單車飛車，市政府聲言會檢控這些「馬路天使」。但一位當地阿婆手無寸鐵，不靠罰單卻成功令住處附近的飛車黨安份守己，幕後功臣竟然係……風筒！？

「一個風筒搞掂晒」

「個日我聽緊收音機，討論緊啲𡃁仔飛車黨，問有咩方法可以整治喎。」64歲的Jean說，「我咪打上去話我一早靠個風筒搞掂晒啦。」

Jean近日在她花園前，手提風筒對著超速車輛，而司機都以為風筒是測速儀，紛紛減速：「仲記得第一次，啲電單車開得鬼咁快，我用個風筒指住佢哋講，『唔使擔心，阿婆幫你錄低晒』，之後我就冇再見過佢哋。」

住在St. Mary's Way的她在家門前的花園開了間小咖啡廳，附近街坊都會來光顧；她店外的街道是連接市中心的主要幹道。「有好多細路係度揸四輪電單車，同啲女仔show-off。有時啲媽咪唔知係咪set頭set太耐，趕住接細路都開到成50km/h（該馬路限速30km/h）。」她指，超速除了造成噪音外，也對住在街上的小朋友構成危險。

用風筒凝聚社區

曾有司機不滿，與Jean爭執。「試過有個成幢廁所門咁高嘅男人，停車行埋嚟問我做乜，我咪指住個風筒話：『風筒嚟咋喎』，佢就冇聲出。」她說，除了火災及自己是煙民，其它她都不怕。

她的舉動也引起鄰居紛紛仿傚。52歲的伯伯Ashley Mays也拿出他的風筒，當Jean不在家的時候幫忙「巡邏」，「冇晒電單車，冇晒超速，全靠神奇的電風筒。」受風筒啟發，他正研究在街道上放置「假測速箱」，進一步杜絕飛車。

Jean強調，她希望借此凝聚社區，無論用一杯咖啡，還是一個風筒。「5、60年代，我哋會因為戰亂而互相幫忙，現代正正需要呢種精神。」除了咖啡廳，Jean亦有間小店賣鄰居的捐贈物品和自己種的小作物，並將收入轉贈慈善機構。

【圖輯.香港渴睡】居港法國女人街拍港人睡相：最初以為他們死了

資料來源：BBC Nottingham、Nottingham Post、太陽報