【Sales唔易做．上】見盡人生百態 「有人特登走入嚟羞辱我哋」
心理學研究指每次認識新朋友，不足7秒便足以產生第一印象。對服務業的人而言邏輯也許相反，客人踏進門口你只有幾秒猜度他的心思。有人說讀書唔成先做sales（的確到這個年代，依然有家長行街時對身旁的孩子一板一眼地如此教訓），日日打開門口做生意，售貨員食鹽多過你食米。有錢人窮人怪人寸人見盡。在港島區一家時裝店做做售貨員的Jessie說：「不時都有人走入來羞辱我們！」
睇眉頭眼額 港島客有不知名優越感
這家古著時裝店門口就在商場扶手電梯的正前方。由客人從扶手電梯升上來至踏進店門之間，Jessie有約三秒判斷客人的職業個性喜好心情從而決定該如何應對。「Sales最重要係摸清楚客人喜好。」誰教你摸？「無人教喎，一入來睇個樣就知。」她做sales 五年左右，已經煉成一套睇相大法。「例如這裏賣的是古著不是一般返工衫，你見到一個OL打扮的入來就會觀察她從哪個架開始睇，短裙定裙褲定長裙，開始在腦中分類。如果佢盲中中好猶疑即係佢唔係成日著，就會估佢放假或去旅行著。」
不過更多時候Jessie寧願以靜制動，一句「Hello隨便睇」之後通常任由客人自由發揮：「唔好chur人，這裡是港島商業區，唔係旺角。」此話怎說？「旺角比較多不同種類的人，受得chur的人比例高一點，chur佢買多件畀個折頭佢，個客通常無咁大反應，sell多兩sell就心軟買埋。」
「但行港島的人有種不知名的優越感。佢哋成日躝街，不少人有種心態，我見識多過你，已經準備好來挑戰你。好多人你同佢打招呼佢當你無到，咁就畀啲空間佢自己睇。」這時一位約30歲的女子四處張望，故意放慢腳步走近一架長裙翻來覆去。
Jessie對她說：「Hello隨便睇。想搵長裙？」話音落下就在空氣間蒸發，沒有喚回一個表情或一下點頭。Jessie對我打了個眼色，示意「就是如此」。
客人離開後，Jessie說，把她們當空氣的客人其實是常態。「有時我們跟客說話，重覆兩次都無反應，驚佢聽唔明，於是轉用普通話，就會換來一句：『其實我係香港人囉！』大佬，有隻狗喺你面前擺尾你都會摸下佢啦。」
怪人躁狂日日有
暴躁的人有幾多？「日日都有喎。有啲人特登入來羞辱我們。」
Jessie的目光投向她的同事Sam。「昨日有個女仔入來，想睇掛在上面個袋，Sam就拿起一把凳子企上來拎。個女仔即刻話：『下？你咁矮點拎呀？』但個女仔本身同Sam都係五呎高…」
Sam說，最近有客人前來試穿平底鞋，一次過拿了差不多十對，一個屁股坐在梳化中間，脫下高跟鞋後把腳趾伸到Sam面前，示意她幫她套上鞋子。「試完之後，客人把那十對鞋，逐對逐對，一手拋到兩米外。我以為自己係下人。」
Jessie呷一口蘋果汁：「早兩日有個客人來取回改好的裙，人未到聲先到。腳步還未離開扶手梯已經聽到佢大叫『我嚟攞衫㗎！』我當堂嚇一跳，即刻把它們找出來。其實件衫是她在另一間分店買，transfer過來拎。我一開畀佢睇，佢即刻大叫：『呢兩件衫無改過！』雖然不是我經手，但我肯定有改過的痕跡，於是我問她是否記得當初點改？『點解我要話你知？』我跟她解釋，因為當日我不在場，所以希望她提供資料，幫她解決問題，她只是不斷重覆『肯定係你哋問題！你仲問我點改？點解我要話你知？』」
下集：時裝店售貨員見盡人生百態 女仔每星期拖不同男仔買衫畀錢
「我真係好想幫佢改好件衫，於是說我幫你改到你滿意為止，拎把尺行埋去，點知佢即刻撥開我隻手：『我唔想畀你改！我住沙頭角嘅，以後一世人都唔會再出市區！』試本來我覺得好委屈想喊，佢一講唔再出市區我就忍唔到笑，小姐你望上去都係得四十歲，仲有幾十年命，同我賭到咁大？」
衰客不是內地人
Jessie口中的「衰客」，由串她年紀大的18歲妙齡少女（記者澄清，Jessie是90後的長髮美少女），到50歲的闊太都有。有人覺得中國的客人沒有教養，Jessie卻不這麼認為：「他們只是大聲、直接一點，覺得貴就說貴，件衫不合身就說不合身，其實沒有惡意，而且也愈來愈少講價。反而是香港人買兩百蚊件衫就畀說話你聽，無啦啦講自己去邊度旅行食咩好西。這些實在多的是。」
Sales卑微願望：只想你點一下頭
當然不是全部是衰客，Jessie記取的更多是有禮貌、好傾的客人。「遇上好傾的客人上來，返工都開心啲。那些衰客不值得我含恨到日落。」我問她，有做Sales有什麼想跟客人說？她這樣答：「下次如果我們跟你說Hello隨便睇，或者問你是否需要幫忙，如果你寧願安安靜靜的行街，那就跟我們點一下頭，微笑一下，示意聽到了，讓我知道自己不是空氣就好。」
（為尊重受訪者意願，受訪者名字為化名，地點稍經修改）