【妥瑞症．一】不能自控的「破嗝」人生 學生：老師鬧我搞事
近日印度電影《我的破嗝miss》在港熱映，劇情講述一名女教師， 出盡法寶教好一班頑劣的學生。只是，這位老師自小便會不由自主地打嗝，間或發出怪聲，身體抽動。她患上的，正是妥瑞症(Tourette Syndrome)。
在香港，粗略估計每一千名兒童中，就有一人患上妥瑞症。基於社會對此病的不了解，他們吃過不少苦頭。有家長認識一名妥瑞症小孩，曾經因上課期間發出怪聲，被老師罰他在眾人面前戴着口罩跪在地上。
攝影：鄭子峰
「Who felt embarassed？」《我的破嗝miss》中，女主角小時候因着妥瑞症的各種症狀，日常生活常出現被人歧視的「尷尬」場面。現實中，妥瑞症小朋友的經歷，不會輸過電影。妥瑞症是一種腦神經病，患者會不由自主做出某些動作或聲音，是帶有遺傳性的先天疾病，6 至 7 歲為病發高峰期。在青春期過後，部分患者的症狀會穩定下來或是完全消失，但也有小部分會一直持續至成年。
上課發怪聲 老師：你嘈到同學啦！
「三年級嗰時，老師成日都話我，問我：『你點解會咁樣，你嘈到同學啦你知唔知？』」今年10歲的Brian，自入學以來，不下數次被老師指責在課堂「搞事」。他4歲時，某天突然不自控地「翁眼翁鼻」，每一下抽動，感覺就如同搔癢，是忍不住一定要抽。而在班房中，每次抽動都會引起老師注意，但又不能自控，加上做功課時因手部抽動而字跡潦草，他曾被老師質問：「點解你要咁？你忍住唔得咩？」
「我唔敢答，都想解釋嘅，但我只講咗『因為』兩個字，佢（老師）就話『冇得解釋！』，跟住鬧得我仲犀利。」Brian指，老師的不理解，令他十分委屈。老師固然令他難受，同學也經常模仿他的動作，傳遍校園，變成群體欺凌。平日出門乘坐公共交通工具，也常常被途人從頭到腳打量「行注目禮」，他坦言感到尷尬，「想匿埋」。他討厭上學，常會「詐病」希望能留在家中，每次成功請假，都令他放下心頭大石。直至父母再度向校方反映，並附上醫生證明，詳細解釋「妥瑞症」是怎樣的一回事，由校方再向老師們解釋，其後，每當同學改花名取笑Brian時，班主任才向同學解釋他患的是什麼病。
Brian媽媽也十分心痛，「由五官、軀幹到四肢，包括肚仔、臀部都會抽動，我會諗，假如我自己全日不停係咁抽，係會有幾辛苦？」她表示，即使近期Brian漸漸在公眾場所減少抽動，但回家後卻會抽得更厲害，「身體上已經咁辛苦，何況佢仲要承受其他人嘅眼光？好彩佢真係好堅強，喊完瞓醒，第二朝有第啲嘢玩佢就冇事。」Brian媽媽指，兒子最喜歡上體育課，一直在運動方面表現出色，近年又愛上跑步，在田徑比賽中獲得佳績，媽媽希望他能將之發展成長期興趣，發揮所長建立自信。「醫院護士教，如果佢要抽動就唔好阻佢，由佢發作出嚟，我哋屋企人個個都知，當佢係平常人，其實慣咗就好平常。」
以為扮Michael Jackson？
15歲的Michael，同樣是妥瑞症患者。「嗰時佢返到屋企，好似MJ(Michael Jackson)跳break dance咁喺度chok頭，我以為佢貪玩扮MJ，叫佢唔好再整，但佢同我講，佢控制唔到！」Michael媽媽指，7年前讓兒子參加音樂劇演出，當中一部份是表演MJ舞步，因此起初對Michael的抽動並沒為意，惟其後愈見嚴重，「覺得佢好痛，個頭不斷chok，功課都做唔到，佢話每朝起身，都係成個人痺晒。」Michael的抽動幅度愈來愈大，有時會似雀鳥拍翼般縮膊，有時喉嚨會發出青蛙般的叫聲，有時會360度轉圈。他們走在香港狹窄的街道上，平日總不免惹來歧視目光，「有時撞到途人，就算係咁say sorry，都會見到佢哋啲面目表情好厭惡，有啲仲真係會鬧。」
與Brian一樣，平日在學校Michael也被改不少花名，「傻仔」、「痴線仔」，更甚者有「精神病人」、「chok頭佬」等。他試過每近「發作」就立刻躲進廁格，但抽動期間不斷撞到牆邊，弄得滿身瘀傷，媽媽除了心痛，還有不忿，「妥瑞症小朋友嘅智商、表現唔係比其他小朋差，佢哋亦冇做過任何一件錯事，只不過係有一個病......社會上認識呢個病嘅人唔多，所以大人同小朋友先會咁易有誤解！」據Michael指，當時老師以為他貪玩、態度散漫上課不認真，但並不知道他是控制不到，而伴隨妥瑞症的，還有自閉症、專注力失調和過度活躍症。「就算有晒醫生證明，老師都冇認真同同學講呢個問題，有時仲因為佢影響上堂，會喺課室、同學面前鬧佢十幾分鐘！」Michael媽媽認為，學校老師如學懂了解，再教導其他小朋友接受身邊不同的人，同時包容患者，已是對妥瑞症小朋友最大幫助。
隨着年紀漸長，妥瑞症的各種病症或會穩定下來，但對青少年的成長，或已留下不可磨滅的印記。到現時為止，妥瑞症仍未有根治藥物，亦因各界對病情的不了解，患者及家長的求醫之路殊不容易。在未有解決方法、只可與妥瑞症共存的日子裏，一班妥瑞症兒童的家長將組織成立「香港妥瑞症協會」，詳情請留意下一則報導。