「佢」哋定「渠」哋：廣東話正字你識幾多　粵音本字或消亡？

溫佐治是個粵語發燒友，鑽研聲韻學多年，近日借來青年中心開辦廣東話課，義教公眾粵音系統。他說因為近些年粵語爭議，許多港人擔心粵語會被普通話取締，紛紛提出要保育粵語，網上亦陸續出現不少粵音本字的資料，教網友日常廣東話的正字寫法及典故。溫佐治看過那些流傳的正字，發覺當中資料有真有假。這天課堂，他講解幾個「㜺鬼」的粵音例子。

上集：【粵難越愛1】中學自研粵音　80後精通聲韻學、開班義教廣東話

下集：【粵難越愛2】港人重讀廣東話？「古人」阿Sir義教聲韻學：語言無分高低

前文提到，溫佐治中學時迷上聲韻學，但老師不是粵語專家，無法深入解答他的疑問，他於是買書自學粵音。十多年後，他偕中學老友創辦導賞組織，帶公眾四處欣賞本土古蹟，近日義講粵語。

他以自己學粵音的經歷，寫了一篇短文，參考港澳學者編寫的《追本窮源：粵語詞彙趣談》及《生活粵語本字趣談》，加入常見的粵語用字說明：

「當年我自學粵音聲韻，遇到唔明嘅地方，對住中學老師，真係打爛沙盆璺到㞘，唔敢做生草藥，罯得就罯，有同學本身都跟住我學，但學學吓就嫌悶，無尾飛堶。後來先知，原來有人覺得學粵音聲韻好奇離，我睬渠都有味，實情粵音都不知幾㜺。」

粵語本字有跡可尋　「亂噏」原寫「罯」？

溫佐治解釋，通常形容人不斷追問事情，會寫成俗語「打爛沙盆問到篤」－－把問題問到最「篤」；但原來正字應為「打爛沙盆璺到㞘」。他說根據《廣韻》，「璺」與「問」同音，解作器皿破而未離的意思；而「㞘」即「䐁」，在《集韻》解臀部，亦即器皿底部的意思。因此原句是解打破沙盆後，裂痕延伸至底部，比喻人們尋根問底追問事情。

至於無尾飛堶，詞源亦出自古代物件。溫佐治說很多人以為「堶」，是同音字「秤砣」的「砣」。「秤砣好重，飛唔到出去。『堶』其實係古人玩的飛磚遊戲的磚階，飛咗出去咪冇咗囉。𠵱家就解釋作無交代、不見踪影。」

以往指稱別人亂講吹牛，會寫作「亂噏」，但溫佐治說，正字應為「罯」，在《廣韻》讀「烏合切」，意解覆蓋，「即係好似以前啲人用山草藥『罯』住。」而「㜺鬼」一詞，一直被寫成「盞鬼」，溫佐治說寫燈盞的「盞」字解不通，正寫應為「㜺」，解作美妙有趣；而形容事物奇怪的粵字「騎呢」，正寫應為「奇離」。

溫佐治說很多古字後來都演變另一讀音字。例如宋代至明清會把第三人稱「他」寫作「渠」，「一啲古代小說常見『渠說』、『渠話』來引述其他人說話，讀「keoi4」，但後來演變成人字部、讀第五聲的『佢』（keoi5），來源就是來自這個字。」

港吸收異國語言文化　成員憂粵語本字被遺忘

溫佐治說這些粵語正字古雅，但現今已很少寫到，「通常我哋識講，但唔知個正字係乜。所以唔止係粵語拼音嘅，一啲粵語本身有嘅字，可能以後都漸漸被淘汰。」組織另一成員Tiffany說，香港文化的包容度高，「我哋成日都embrace（擁抱）咗人哋嘅文化。好似『人氣』、『割引』呀，係日本傳過來，𠵱家都好似變成我哋嘅中文字。」Tiffany擔心香港吸納別些語言文化同時，粵語本字讀音會否因此漸漸消失。

溫佐治亦留意到，現時有些官方機構的用字都傾向「大陸化」。「例如我哋以前唔會咩都講『優化』、『打造』，會喺貼切語境講『改善』、『建立』。」而且，部分講廣東話的港人甚至不自覺以書面語用字作日常溝通。他舉例，以前問別人工資多少，粵語會講「你人工幾多」，「但𠵱家我聽到有人用普通話直譯問：『你工資幾多』，工資係書面語，唔係用嚟口語溝通。」

溫佐治指，舊時香港殖民年代的公告或信件，反而保留不少文言文寫法，語境準確又簡潔。「例如叫人唔好吸煙，你會點講？『請勿吸煙』已經寫得好得體又莊重，個『勿』字有阻嚇意思，但𠵱家係會寫成，『請不要吸煙』，傾向白話文寫法。」他說這些寫法沒對錯，多學其他語言如日文、普通話亦無妨，「但唔好忘記我哋粵語本身嘅語言文化。」