【餓狼人生2】獵頭隨時on call　為佣金賠上愛情：住元朗是弱點

獵頭（headhunter），替客戶網羅人才，替打工仔找好工。實際上，他們是一群靠電話揾食的餓狼，巧言令色，說賣的是夢想。一年揹著400萬的跑數人生，換來的每月十數萬的收入。當然，犧牲的是活在一個與虞我詐的世界，每日睡四小時，冇work life balance，還有愛情。「陪唔到女朋友，有兩三個因為咁而散咗。」獵頭久保說。為什麼要苦了自己，生活於一個無法說真話，如此複雜的世界？
攝影：陳芷慧

上集：獵頭久保出書分享職場上所見的光怪陸離，有客人要求私人司機要有古天樂的質素，亦有應徵者為突圍而出，履歷表附加泳照。獵頭中介的壓力就是「雙重間諜」，客人與應徵者，兩邊花盡唇舌，為完成跑數人生。請點撃以下連結：

【餓狼人生‧1】年跑400萬數   獵頭出書分享奇事：司機要像古天樂

「我哋得一日拍拖，你可否關機？」

久保居於新界西，每早6點起床，「官方」的工時是早上8:30至傍晚6:30。日間的時間是電話裏頭的戰爭，時間寶貴會用來Cold Call、揾客、開會。「但通常我7:30至9:30先走。」平日晚上的時間他會用來會見Candidate（應徵者）。「好多獵頭唔會見Candidate，左手交右手。但我唔想咁，我會見Candidate，了解佢哋想要乜。你難保他日他會是某公司的總裁，又或是某總編。」兩次相約久保晚上訪問，他都說：「好，但我之後仲要見應徵者。」記者問：「咁你邊有時間拍拖？」久保有點尷尬，回答：「係啊，好慘㗎喎，𠵱家冇拖拍囉！」

訪問的一個小時，久保的電話接二連三地響起，有時候剛放下電話，電話又響。即使電話靜下來，拇指還是不停在熒幕上滑完打字滑完打字。眼神出賣他，他明顯慣常一心三用，手指在回覆訊息，口在回答我的提問，腦「出竅」思考其他事情。他說：「我腦係轉得好快，同你講緊嘢，同時我個腦就諗緊其他嘢。」與女生吃飯，她曾問：「點解你個腦好似諗緊其他嘢？」

約會時亦有女生曾問：「我哋得呢一日拍拖，你可唔可以熄機？」久保苦笑：「我連瞓覺都唔可以熄機啦！」身在外國的客人隨時要請人急call，「這行分秒必爭。」入行之初年少無知，戀愛大過天，「真係熄機啊。真係miss咗好多機會。個客咪話『揾你揾唔到，個candidate唔見喇，唔使再揾我。』」一個未接來電，不只輸掉一張單，而是一段有利可圖的關係。力爭上游，除了為錢，為事業，同時為換來一個喘息的空間。「以前啲客真係會鬧你，但𠵱家佢哋係我『朋友』」，關係變得對等，沒及時接一個電話，傷害沒這麼大。周五晚上，電話較為清閒，他會選擇一間難收訊號的戲院看一齣戲，如圓方Grand Cinema，一星期至少有兩小時可以耳根清靜。

得30萬佣金   賠上愛情

「如果我約咗你，半小時前先放你飛機，畀著你，你頂唔頂得順？」久保問。入行多年，他不再要找「貌似古天樂的私人司機」、「內外兼備的茶水阿姐」，招聘的職位皆薪水6萬元以上，Candidate不是行政總裁，就是財務總監。有次他突然拋下女朋友，趕赴上海約見Candidate。「那張單80幾萬。」是兩個月要跑的數！

要自貼機票趕赴外地，因為對手不只同事，還有很多獵頭公司。這行有一個「霸地盤」的行規，獵頭中介接觸一個Candidate，其餘人三個月內不准聯絡搶單。「所以有啲同事會較定鬧鐘，三個月期限一到，即刻打畀對方的Candidate，插旗。」因此，當其他獵頭公司還安坐家中等待對家的電郵回覆，他便先到上海，插旗捷足先登。

回來後的下場是得到30萬的佣金，卻失掉愛情。「回來後，佢同我分手。最後發現對方有第三者。」掙扎？後悔？他搖頭說不：「我覺得我對得住天地良心，最差係冇時間倍佢。一個月見到兩、三次。」他說「睇化咗喇！」甩拖如同甩單，兩者都變得麻木。

久保於今年書展出新書，分享職場所見的光怪陸離。係邊本新書？請點擊下圖：

同事吸毒、吃大麻減壓

「這一行真的很大壓力。」久保說。記者問及與同事關係，他說：「我哋冇關係。」前同事從來不是隊友。他說公司內每組人有其地盤，負責不同工種。曾有位狼子野心的女同事，不僅增聘人手霸佔他人地盤，「跟開PR、marketing，又踩界做埋finance，HR又做埋會計。」還於老闆面前作故仔，搬弄是非。「我老細好迷信，擺風水。女同事話覺得佢個位對住對門唔係咁好。佢喺公司群組話係久保咁講，老細話我散播搖言。」

「同女朋友講佢都唔明。」他怪她們無法進入他的世界。女人不明白為何他要穿得端莊去見客，不明白為何要花盡唇舌去搶單；不明白他工作每一步充滿變數，那種無法掌握的忐忑，有時候客人與應徵者要簽約了，卻收到客人的總部要調上深圳，要求員工深港即日來回，又或是應徵者突然家有事要飛回加拿大、丈夫有外遇不想轉新工等等的壞消息；她們無法想像久保活在謊言中那種身心俱疲；加以跑數的壓力，辛苦了一個月，月頭又從零開始。

入行頭兩三年是搏殺期，一星期約見30個應徵者，一日約見5、6位，「同事話我好似接客咁。」辦公室內有一個報告板，紀錄各組跑數的成績。星期一、三、五開會，老細捽數，「老細成日話你不如講吓今星期打算點...…心諗星期一講完，星期三都唔會有offer㗎啦」，「有同事返工會跑入廁所喊，男女都有。有人會食大麻、吸毒、入廁所自慰...…」去年年尾，久保破紀錄創下1個月接洽6、7張大單，合共過百萬，「辛苦到唔係人，我唔會再試」，完成創舉，久保仿效梁朝偉即飛英國餵鴿放空的做法，立即跟老闆告假，飛往英國睇一場波。

居於元朗　港女嫌遠

前度曾問：「點解你唔辭職？」久保苦笑道：「辭職，我點同你拍拖？」久保骨子裏是少男浪漫主義，會記紀念日，會儲戲票寫下感想，花數千元灌錄一張CD送女友，女人會嫌他不切實際：「點解你唔送個手袋畀我？」一份可觀的收入，不愁浪蝶，只是惹來的女人都不是他想要的女神。「唔知係咪叫弱點呢，我住喺元朗。同人哋講我住元朗，十個九個都嫌遠，就冇可能一齊㗎喇。佢哋（香港女生）期望我會畀到佢哋富裕的生活。住元朗，啲人會白鴿眼。」不過，獵頭中介向來善於包裝，「所以我會同人講，我住荃灣西下一個站，錦上路，啲人就覺得好近。」事實上，錦上路就夾在元朗和荃灣西之間。「不過，我當話我買咗間村屋，佢哋就雙眼發光，話聽講村屋好大。」，「現在，我唔會用呢樣嘢吸引人。」

曾與內地、星加坡、香港女生談戀愛，「香港女仔比較勢利啲。」他見過有女行家穿低胸短裙，每周陪遊各大公司的總裁；他的師父在床上與女行家交換情報，「唔會同行內人拍拖，呢行女仔太大野心，太強勢，好難相處。」

與母相依為命

久保曾與一個女生相戀兩年，談婚論嫁，「我想結婚後同媽媽一齊住，但佢唔想，我覺得唔合理。」當年他父親「撈偏」，有段日子警察常來敲門，後來父親避走他方，就沒有再回來，此後久保與母相依為命。他16歲到澳洲升學，「我唔會掉低佢，我細個都掉低佢10年去外國讀書。」，「將心比己，你冇兄弟姐妹，得一個阿媽，你都唔會掉低佢。」入行之初，$16000元薪水，家中面對經濟壓力，他是母親唯一的支柱。他數算著，「開始萬六，然後二萬四，再三萬六、四萬八......」一串數字蕰含他7年來的努力、犧牲、疲累、無奈。

記者問過他兩次，為什麼要選擇這種複雜的生活，為人工？他說：「當然。」電影《A Family Man》講述獵頭的人生，當中一句「家家有本難唸的經，但別為工作忘卻家庭的價值，家只有一個。」這句對白相信亦是久保的內心寫照。「所以你問我點解要keep住喺度做呢，其實我有個夢想，五年內再買村屋，地下連花園，複式嘅，媽媽住一層喺地下，種吓花，養吓狗。我同老婆就住上面一層。」

「好悲哀，見過好多人（女生），但暫時未有人sparkle我。（產生火花）如果令到我覺得有火花嘅人，可能就係一開始接受到我份工作、住元朗，同我媽一齊住嘅人。」