中伏工作假期？　徒手挑地氈沙粒　受歧視被炒：你是該死的亞洲人

Jacky畢業後工作1年，2011年就決定辭職去澳洲工作假期。這趟旅程歷時1年，一共做過12份工，包括農場、酒店、工廠、洗碗等等。當中只有2份是自己辭職，其餘都是無故被炒；原因可能是旺季完結，需栽減人手，或只因他們是亞洲人而被炒。上集Jacky提及曾有農場䚰稱有幾個農場可做長工，卻被逼1小時為13棵蘋果樹挑走次等蘋果，3日完工後即被炒。
旅途中段，他在一家間位於國家公園的酒店做房務工作，簽約1個月。那裏可謂飛砂風中轉，即使吸光了房間裡的沙粒，只要有人開房門，就會有沙飛進去。Jacky受訓時，清潔嬸嬸也教他不用在意沙粒。經理也知悉清理沙粒的困難，閒時碰見Jacky還會說說笑笑，一直相安無事。

上集請看：

【中伏工作假期】農場䚰稱聘長工　1小時摘13棵蘋果樹　3日即炒

直至第3個星期，旺季尾聲，酒店的客人開始減少，經理突然變臉，挑剔房間裡有沙粒，刻意刁難Jacky：「This is a f**king sand！」小如在地氈裏的沙粒，經理竟要求Jacky徒手逐粒挑出沙粒，因而拖慢Jacky的工作進度，經理又鬧：「咦，你比人慢好多喎，咁你唔得啊。」

被耍2、3天後，Jacky和另一個韓國同事就被叫進老闆房間：「因為你嘅表現實在太差，所以我就要炒你。」身旁的同事因不諳英語，只能用簡單粗口罵老闆。Jacky深感不忿就逐項工作跟他辯駁。老闆再沒能搬出合理理由，他乾脆直截了當地說：「Ok。Because you are f**king asian。」Jacky聽罷頂撞老闆說：「唔該你注意下你嘅態度，你咁講嘢我可以告你，你講多次？跟住佢即刻淆底。」於是，老闆叫他們滾出辦公室。他和韓國同事頓時就失去工作。 

澳洲同事可以沖茶休息，你們不可以。

Jacky亦遇過一個純粹不喜歡亞洲人而刻意挑剔的上司。當時，Jacky在一間海邊酒店做房務工作，與澳洲的清潔嬸嬸相處融洽，輪流清理特別「惡搞」的廁所，間中停下工作，沖泡房間內的茶包休息。返工一個月來，Jacky一直滿意工作環境；直至經理回來，Jacky5日就被炒了：「佢返嚟之前，班嬸嬸同我講，佢有啲種族歧視啊，你同韓國人小心啲。」

經理對Jacky毫不尊重，稱呼Jacky為「那個中國人」。清潔房間時，嬸嬸說：「出嚟飲茶啦。」經理卻刻意阻攔：「你哋可以飲，佢哋（Jacky和亞洲同事）唔得。唔使做啊？」

經理回歸的5天裏，經理要求Jacky清潔所有廁所，更要他用筷子夾出藏在浴門路軌的頭髮。清潔時間長，則指責他手腳慢；後來又要Jacky獨力清理4間雙人房。Jacky停下來休息喝水，也會被罵偷懶。Jacky努力應付，經理最後還是以：「你做嘢太唔掂啦。聽日唔使返工。」

縱容白人同事返工飲酒、食煙兩小時

面對種族歧視，Jacky覺得不公，而最不忿的是，白人同事工作才是不濟：「好老實講如果你澳洲冇咗班亞洲人，我諗你個經濟會崩潰、破產都似。因為班澳洲人甚至歐洲人都唔係做嘢。實際做嘢真係啲亞洲人，啲鬼佬全部都唔做嘢，但係因為佢哋係白人就會縱容。」大部分老闆都傾向逼迫亞洲人工作：「佢哋會覺得，你班友做得快應該做得更加快，佢哋（白人同事）唔做得未慢啲。」

「佢成班喺度hea、飲酒，我做Housekeeping嘅時候，個個返工都攞住杯紅酒、白酒喺度飲，飲到醉醺醺 ，我就喺度做緊嘢。」Jacky曾經做過一家酒店，與德國同事合作。她每天都邊飲酒邊工作，有時還會偷喝客人房間裏的酒，吃人家的水果：「佢話飲少少唔會發覺，提子、香蕉，佢攞嚟食，食一兩粒唔覺。你食咗人哋成隻蕉，點會唔發覺。」偶爾德國同事抽煙休息，一走便兩小時。Jacky曾向經理投訴不果。後來，酒店的客人減少，老闆還是選擇叫Jacky不用上班，而偷懶成性的德國同事卻如安然無事。

接受計劃趕不上變化   

雖說旅程中遇過種族帶來的差別待遇，但Jacky也遇過可以發揮、有滿足感的工作。例如Jacky又引入香港常用的派籌方法，解決餐廳大排長龍的問題。在唐人餐廳工作時，老闆也把Jacky當成家人看待。

若沒因「中伏的經歷」離開，可能也遇不上後來的好工作。這些經歷中伏與否視乎旅者的角度與心境，高高低低的旅程卻令Jacky更能面對突如其來的變化，也令他對工作的想法跳出既定的框框：「唔一定要喺香港做死一份工。」Working holiday結束，他回港後做過酒店、旅遊記者、編輯，現為自由工作者。

寧受盡歧視　回港工時長更是地獄

回港工作的日子，Jacky笑說：「好似返回地獄。」在澳洲受盡白眼、歧視，不會覺得回港生活反而更好嗎？他卻說：「喺香港朝9晚9做嘢，我寧願受盡白眼，始終那裏識得work-life balance。最簡單呢樣嘢，就算你幾激氣都好，我收咗工、落場嘅時候冇嘢做都可以去海灘睇吓書。」香港生活空間擠迫，Jacky回港後更覺身旁密集的樓宇彷彿都要壓下來：「起碼喺澳洲空氣好，見到個天先。」

在澳洲Working holiday的一年裡，Jacky除了見盡種族帶來的差別待遇，還發現香港人已被部分澳洲老闆列入「黑名單」。後文再續。