【專訪】非主流一定唔成功？ 胡琳：好多音樂人被快餐式主流打敗
歌手胡琳於2006年入，至今總共推出了12張大碟及1張新曲加精選。曲風以爵士樂及R&B為主的她從來在音樂上也主張個人風格，不會隨波逐流。雖然入行初期在事業上未有亮麗成績，但隨著2010年推出發燒天碟《Jazz Them Up》，無論外界反應或唱片銷量，胡琳都得非常高的評價，在2011年，她舉行一連兩場《Bianca LIVE! with New York Jazz Cat》音樂會，而且終於得到認同，被業界譽為新一代的「爵士小天后」。
「老實講，有段時間出面嘅人以為我第一張專輯就係翻唱碟《Jazz Them Up》，雖然佢哋可能未聽過我之前嘅作品，但得到佢哋嘅認同係一件開心嘅事。」胡琳說。
攝影：江智騫
場地：OM Tapas
歌手胡琳（Bianca）自出道以來音樂風格均以Jazz及R&B風格為主。由於她的作品並不是大眾容易接受的「商業歌」，所以她的樂壇事業相對不易走。話雖如此，直到她出道第5年，她終於憑著自己對音樂的堅持終於在業界贏來「爵士小天后」的美譽。雖然她的音樂被指是非主流，但她卻認為音樂不應以主流或非主流來定義本身的價值：「其實音樂唔應該分主流或非主流。當一種音樂喺電台播得多，或者潮流興起嘅時候，無論本身係咩類型都自然會變成『主流』。以Hip Hop（嘻哈音樂）為例，其實Hip Hop已經喺外國成為主流超過十年，但係近年熱潮慢慢被EDM（電音）取替，唔通你形容EDM係非主流？其實音樂與時裝生態一樣係一個圓形，一個循環。我深信不同種類嘅音樂係真係有自身價值，你要跟潮流做一定跟唔上。」
提到她今年的全新唱片《Moments》，今次Bianca的音樂風格她以往作品闊，而且還加入不少自己原創的作品：「我初初打算收錄兩首自己嘅創作。但上年花咗一個月時間喺美國紐約創作，最後竟然完成5首作品。我發覺安靜嘅環境真係幫助到我創作，與世隔絕，旋律自然會喺腦海入面出現。」
提到她將於5月尾舉行《胡琳shining moment演唱會2018》，她透露為了增加可觀性，今次將由排舞師Sunny Wong為她排舞。對於今次是她首次在Star Hall開個唱，她認為這是她事業的大躍進：「場地比之前大一倍，由千幾人場地變成可以容納3千幾人嘅大場。所以我今次點樣可以喺咁大嘅場地同觀眾互動係好重要。」
音樂創作人都被呢種所謂「快餐式主流」打敗
Bianca在受訪時認為，一個歌手的音樂作品應該跟隨著個人風格，而且應該重質不重量，「有啲唱片公司好似快餐店，每年要出一定嘅量。不過有時因為咁而首首都差唔多，令歌手個人風格越來越少，有一啲歌可能因為太似而分唔到係邊一首打邊一首，我覺得呢個就係唱片業最大嘅問題。當然呢個情況唔單止在香港，世界其他地方一樣會發生。所以有好多音樂創作人都被呢種所謂『快餐式主流』打敗。」胡琳表示。
她續說：「不過依家呢個年代都有可取嘅地方，因為資訊太方便，再唔係電台或電視台播咩你就要接收，受眾可以有自己選擇。所以我唔受『快餐式主流』限制，我覺得作為歌手應該要勇敢去為自己選擇，做一啲唔會令自己後悔嘅音樂。」