胡琳五月開九展Jazz Concert　出道12年笑言自己逆向生長

爵士天后胡琳今日在尖沙咀六公館舉行《Shining Moment 2018》演唱會發布會，寒風刺骨，但Bianca仍身穿露肩長裙現身，仙氣十足。

今次演唱會將於5月26、27日九展Star Hall舉行，以「蛻變」為題，更邀請了美國的爵士班底New York Jazz Cats來港演出。出道12年，胡琳笑說自己最大的變化是眼見從以前的成熟形象變成現時的「BB樣」，逆齡的感覺非常神奇。

不過今次除咗開演唱會高興，今日Bianca都可以記係滿載而歸。除咗從家燕姐、陳欣健、陶傑、劉家豪、梅小青等前輩身上得到唔少鼓勵說話外，更有鄭丹瑞手中接過「天籟歌后」嘅牌匾，又有Audi做演唱會Title Sponsor，仲有鮑魚收，未到新年已經又食又拎。

繼早幾年前在演藝學院和香港文化中心演出。今次胡琳首次把舞台帶到九展Star Hall，眾所周知，在Theatre聽Jazz，聲音的質感多多少少會跟演唱會場地有所不同，這對胡琳來說又會否成為一個關鍵的問題? 接受《香港01》訪問時，她坦言：「其實我好鍾意演藝嘅場地，因為佢為好多音樂劇、舞台劇提供咗好頂尖嘅器材，不論燈光同音響。不過今次想多啲樂迷可以參與，所以選擇咗Star Hall。其實之前嘅Concert除咗爵士音樂，我哋都放咗好多流行性多啲嘅元素落去，今次都一樣。唯一擔心就係場地大咗，可能會冇咗同觀眾間親密嘅感覺，我一路都有同製作團隊商量，點樣令聲音上繼續保持到親密感，尤其要關顧埋二樓嘅觀眾，希望到時做出嚟可以帶出pop jazz同觀眾可以好close嘅主題。」

臨近新年，問到Bianca會否為演唱會而刻意少食賀年食品，她笑言：「今年要同屋企人一齊過，所以無可能Keep Fit，阿媽一定會監實我食好多嘢，為咗我表現出我係一個好健康又肥又白嘅孩子，我要喺佢面前搏命刨飯。最緊要新年令屋企人開心，其他嘢之後再諗。」