【專訪】每月支出六位數點開飯？　MastaMic：出賣靈魂我收得好貴

「每年都會唱Rap Up」、「Rap得好快」、「Hip Hop蔣志光」這些也許是你對MastaMic的印象，但你對他的作品認識有多深，是否因為《HK Rap Up》成絕響你才開始「懷緬」？
攝影：陳順禎

即使去年《中國有嘻哈》在內地爆紅，令Hip Hop曾經抬頭，但現在內地進行封殺，Hip Hop也只淪為曇花一現的「潮流」。Hip Hop在香港還未能撕下「地下」的標籤，雖然一直有人默默耕耘，但又有幾多人了解及推廣其背後的文化？

MastaMic也只能說一句：「講文化嘢邊有人聽㗎，除非我係G-Dragon啦！」

某個前輩淨係識X！

Hip Hop不只是音樂類型，也是一種生活態度，一種文化，但有幾多人嘗試去明白？或許是大家聽到「文化」二字就卻步，覺得定必是艱深複雜的事情；或者被某些人嚇怕，MastaMic說：「某個前輩淨係識得X，但佢冇話你知背後文化點樣嚟，淨係話你唔識Hip Hop！」

他續說：「其實我哋都係受歐美文化影響，做Hip Hop班人如果真係想多啲人認識，係要諗方法推廣，而唔好將有興趣嘅人拒諸門外，唔好攬住『我好識嘢』個光環啦！」

所謂「Hip Hop文化」並非高門檻事情，MastaMic舉一簡單例子說：「波鞋興起係因為Hip Hop，Air Force 1分『Uptowns』、『Downtowns』都係因為Hip Hop，但係冇人同你講之嘛！」

想改變你就要紅！

香港地就是一個「速食」的地方，身處樂壇想推動一個文化，前題就要變紅，但成名後你如何使用這股「力量」就值得深思。MastaMic說：「啲人成日問我點解要Pop，要上主流，唔係因為要人認同，而係咁樣啲人先肯聽你講嘢，背後個想法係點。」

他續說：「我唔係咁清高，老實講我都想搵錢生活好啲啫！但同時間，你可唔可以用7成時間去搵錢，可唔可以用3成時間回饋個文化先？」

MastaMic舉Kanye West作例子：「我好respect Kanye West，唔係因為佢潮唔潮，而係你睇番佢嘅製作，以佢個level開場show咩都冇，一個video wall，一個DJ，揸支咪就夠啦，咁咪可以cap到最盡囉！但係佢冇，佢每場show都落足心機。」

「音樂工業」就好似賣牛河咁，你淨係諗點解賺到最盡，但係你唔去諗提昇食物質素，咁個生意點會做得好啫？

《中國有嘻哈》嗰期好多客Call我，但係…….

相信不少人因為《中國有嘻哈》再次留意Hip Hop，因為「潮」吖嘛，不少廣告客戶都想食住個勢，但似乎把事情看得太簡單。MastaMic說：「《中國有嘻哈》嗰期都好多客call我，但係佢哋又想平做到嗰個效果，點做呢？」

MastaMic舉一親身案例：「有客戶想幾萬蚊做隻歌加拍MV，條數點篤呢？MC Jin同TT拍支付寶廣告個set，喺香港一定過十萬走唔甩啦！我唔係要吹捧《中國有嘻哈》，但人哋製作費講緊講緊億億聲；香港仲有幾多個單位，肯用多少少資源放喺Hip Hop上面。」

事隔5年再出碟，中間幾年靠咩開飯？

MastaMic上一次推出專輯《流行反擊戰》已是5年前的事，到本月中才推出第二張專輯《MASTAPIECE》兼開音樂會；雖然中間那段時間有「擠牙膏式」出歌，但如何維生？MastaMic笑說：「對於出賣自己靈魂嘅嘢我都係收得貴㗎！」他解釋：「我維生方法不外乎都係嗰三隻，做Featuring、做廣告、做商業Show。我網上post嘢都收錢㗎，啲人唔知咋嘛，佢哋覺得我唔係KOL嘛！佢哋又知我收得平？」

玩音樂燒錢是常識吧！尤其MastaMic是Solo形式運作，任何製作都是自資，那月入多少才能維持生活？他透露：「要營運呢件事月入起碼六位數字先叫穩陣。」

自資幾十萬開Show，玩大咗……

MastaMic 將推出新碟《MASTAPIECE》兼開Show，今次挑戰旺角麥花臣場館，他亦坦言擔心票房：「我所有嘢都係大部份自資，Concert，出碟，成本真係好大，洗到成頭泡！今次個場玩大咗，早知玩細啲啦！如果揀Music Zone我爆咗啦X！」

他續說：「其實我生活同普通人一樣，見到鍾意嘅嘢一千幾百想買都可以；但係今次個Show幾十萬，如果賣得唔好，我蝕到仆X，仲邊有資源做落去呀？真係有諗過收皮！」

我全部自資，已經唔係講緊有冇心做嘅問題。如果今次蝕到仆X，有心都未必有力再做。

雖然MastaMic諗過「收皮」，任何事都要自資壓力大到爆煲，笑言「身處絕境」；但做歌仍然有火。除了近期的《Fire》、《Not Afraid》之外，還有一些驚喜之作，想睇「劇透」同埋想睇MastaMic點樣反擊「Rap得快唔等如Rap得好」嘅批評，記得留意下一集報道！