【專訪】反擊不負責任樂評 MastaMic：有幾多人真係識聽Hip Hop
MastaMic自資幾十萬推出新專輯《MASTAPIECE》兼開騷，就連佢自己都話今次玩大咗，如果蝕太勁分分鐘要「收皮」。雖然聽落好灰，不過佢依然有火。無論係做新歌，抑或反擊負評，同樣拳拳有力：「我使X你教我乜係Hip Hop咩！」
攝影：陳順禎
「我從來冇話過Rap得快就越好」
「Rap得快唔等如Hip Hop囉」可算是對MastaMic的「熱門留言」，速度是他的特色，同樣因此經常被批評。MastaMic沒好氣說：「其實我rap得好快嘅歌比例真係好少，可能10隻有7隻慢，但啲人淨係話我Rap得好快，我從來都冇講過Rap得越快就越Hip Hop！Rap得快只係我鍾意嘅模式。」
又有人話「Rap得太快聽唔到歌詞」，MastaMic回敬說：「聽唔到聽咪唔到囉！每首歌嘅功用唔同，點解要用一個concept去聽所有歌呢？好似一啲好快嘅結他solo，你都執唔晒所有音㗎，你係聽個情緒，聽個氛圍㗎嘛！Vocal(人聲)都係其中一種樂器，Rap得快你咪當聽緊鼓個Hi Hat，聽個節奏嘅分佈。」
反之，亦有聲音批評《HK Rap Up》句子分佈「齊葺葺」，指歌曲沒有技術，MastaMic亦感到莫名其妙，他說：「大佬，你捉住我一隻歌去鬧晒所有歌，冇得好講㗎喎！就好似我講明個麵勁辣，你就話我淨係識煮辣；我寫咗其他風格嘅歌你哋唔聽，然後就話我所有Rap都係咁，真係好搲頭！」
他續說：「依家嘅樂評人要話俾人聽自己識好多嘢，我真係好寸咁講句，有幾多真係識聽Hip Hop啫？」
香港聽歌風氣普遍都「詞大過曲」，難怪大部份負評都執着於「Rap得太快聽唔到」，並一概而論指MastaMic的歌詞沒有深度，對此他也沒好氣地說：「如果係黃偉文填詞，啲人咪覺得正囉！有時真係唔知佢哋『OK』嗰條線擺去邊？」
「要落評論之前，不如先了解多啲個artist其他作品，再綜合寫一個公道嘅評論啦！」
專訪上半部： 【專訪】每月支出六位數點開飯？ MastaMic：出賣靈魂我收得好貴
《MASTAPIECE》新歌小劇透
筆者進行專訪當日，「偷跑」先聽幾首新歌，猶如一個小型的Listening Session，MastaMic更分享了創作靈感以及當中值得玩味的地方。
1.《Fire》
《Fire》是最近期推出的歌曲，完全是技術向的作品，感覺有些似《Hate Me》的延續，但歌詞節奏排列及複雜程度，完全是另一個層次。
MastaMic說：「啲人成日批評我Rap得快吖嘛，咁咪做隻再快啲囉！雖然《Fire》bpm比《Hate Me》慢，但今次《Fire》有double time，三連音、六連音等等元素，所以歌詞更密集，速度更快。」
I am the man on Wire /叫我咪太快
Set my mic on fire /叫我mic太快
I am the man on wire /Mic’s on fire
Streets get higher /叫我mic太快
2.《破地獄》
《破地獄》曲風是現時流行的Trap，一響前奏已營造了詭異的氣氛，用呢喃語氣唱着破地獄儀式的經文：「茫茫酆都中，重重金剛山，靈寶無量光，洞照炎池煩……」，內容在批評一些看不過眼的人與事。
MastaMic：「就算玩Trap唔代表個flow唔可以多變，歌詞內容係將我睇唔過眼嘅人比喻為『鬼』，用呢首歌去超渡佢哋！」他續說：「我成日覺得寫鬧人嘅歌，雖然有人會覺得好厭，但係個功用在於俾人練寫歌詞。你可唔可以用新嘅角度、包裝、比喻去鬧呢？」
3.《ROCKSTAR》
一首揉合Trap與Rock兩種風格的作品，中間的結他solo實在是一大驚喜，所以話玩Trap唔一定係節奏疏落，元素簡約，一樣可以玩fusion。無論音樂元素還是歌詞都見到將Hip Hop與Rock的事物共冶一爐，而且簡單幾句歌詞就能讓聽眾明白在批判甚麼現象。
「竟然有搖滾係追求Hit Rate，樂隊做訪問個個扮晒謙卑」
「舊嗰套精神一早變味，Shit！多口講咗真話洩露天機」
「唔怕一無所有叫我崔健，唔似你哋甘心俾人催眠」
「Rap Like JIGGA，Move Like Jaggar」
JIGGA：Rapper Jay-Z的外號
Jaggar：樂隊Rolling Stone的主音
MastaMic新專輯《MASTAPIECE》共收錄13首歌曲，想完整聽晒就要等到音樂會當日，可能大家睇完文字描述已經有晒畫面，睇Live嗰陣仲得了？淨係全場大合唱破地獄經文已經夠過癮啦！