盧巧音演唱會驚喜浪接浪　鄭秀文撐場：有咩用得着我嘅就用啦！

盧巧音昨晚於旺角麥花臣場館舉行《RE:TURN Candy Lo Concert 2017》尾場，已經9年沒有在香港開騷的Candy發揮超水準，而且《三角誌》、《深藍》、《垃圾》、《落地開花》、《天下》等等無論主打或Side Track作品都唱齊，一次過滿足晒樂迷願望。演唱會還邀請到Sammi鄭秀文作嘉賓，大唱《喜歡戀愛》及《不要驚動愛情》，為樂迷送上驚喜提早慶祝聖誕。

見到Candy玩得咁放，相信各位樂迷都好開心！(江智騫攝)

盧巧音與鄭秀文以一紅一黑造型登場，先合唱《喜歡戀愛》，兩位靚聲不用多介紹，加上台風穩陣，一開口便抓住樂迷耳朵，只專注狂歌聲之中，無暇舉機拍攝。唱完《喜歡戀愛》後二人擁抱，Sammi興奮大叫：「應該要俾啲掌聲盧巧音係咪呀！」隨即掌聲歡呼聲四起。

Sammi又話：「其中好有意思就係，知道你過去兩年都有啲經歷，有啲狀況。呢啲狀況我都曾經經歷過，睇完你嘅訪問我都有好大感觸！嚟到今日見到你健健康康，行返上個台我自己都好開心！好感動！有咁多fans支持你掂㗎喇！」Sammi又講笑話：「其實我唔介意做嘉賓，我覺得其他歌手有咩用得着我嘅地方就用啦！我係好開心㗎！」然後唱出《不要驚動愛情》令全場再次歡呼聲連連。

Sammi驚喜現身，唱出《喜歡戀愛》及《不要驚動愛情》。(江智騫攝)

Candy在演唱會拿起結他翻唱了Nirvana的《All Apologises》和Lady GaGa的《Million Reasons》，一支木結他加一把人聲亦足夠壓台，尤其以抒情的方法演繹《All Apologises》能令觀眾靜下來，專心思考歌詞的訊息。

近年愛上跑步的Candy在台上分享她的改變，她感觸話：「人係需要打破自己紀錄，我都43歲喇，依家唔做嘅話，我驚到蓋棺嗰日......會後悔。」樂迷聞言立刻「啋！」、「長命百歲呀！」Candy豁達回應話：「人總有一日會死㗎啦。」分享過自己的心聲後，Candy唱出《天下》、《紀念品》、《煩》及《800伴》為演唱會劃上句號，她又話：「我朋友＿點只800個呀！」感激各位樂迷支持。

完騷後Candy接受訪問，被問到今次演唱會後是否代表將全面復工？她表示：「其實之前都冇話停過工嘅，只係之前做幕後嘅嘢比較多，做完個騷覺得信心返番嚟，所以可以繼續做關於音樂嘅嘢！」那選擇年尾這個檔期是否有特別意義？她說：「真係咁啱啫，原來個騷係下年先搞，咁啱有啲投資者同埋有期，就問我同阿叔（何兆基）；之後我哋都覺得ready所以就試下啦！」

另外，今次演唱會的樂手都是Band友，如秋紅的結他手阿曦與Andrew，Cassette的主音Aeolus擔任和音，這個陣容是否份外有親切感？Candy表示： 「其實係㗎！因為今次隊band個個都識嘅，尤其band leader小明識咗好多年，又係我老公（Sammy）嘅老死，變咗溝通會方便啲，唔使就住就住驚對方會嬲。」

Candy選擇翻唱《All Apologies》及《Million Reasons》是否代表着自己的心聲？她表示：「其實係因為自己好鍾意呢兩首歌，同埋想將《All Apologies》送俾Kurt Cobain，雖然佢走咗喇，但都希望佢喺上面聽到。而且呢兩首歌都代表到城市人嘅心聲，情緒病唔只係我哋呢行先有，其實我聽身邊好多人都有，都好緊張，所以希望大家會俾多啲愛心，唔好吝嗇一個擁抱。」