【十大中文金曲】Supper Moment及ToNick同台得獎　打破樂隊定型

由香港電台舉辦，「第四十屆十大中文金曲」頒獎典禮今日於香港知專設計學院綜藝館舉行。樂隊Supper Moment及ToNick以往被標籤「獨立」、「Indie」，今次同台得獎，可謂樂隊文化的里程碑，同時鼓舞了其他一直默默耕耘的樂隊。

Supper Moment與ToNick成軍超過10年，如果有留意開香港樂隊圈的讀者都會記得，從以往大大細細的Live House、西灣河蒲吧、大學AP演出，兩隊樂隊經常同台演出，可謂同期出道的「兄弟Band」，事隔多年終於一同打入主流平台一同得獎，實在意義非凡。

ToNick今年勢頭強勁，《長相廝守》傳唱度十分高，同時亦憑《長相廝守》奪得十大金曲獎，台上主音恆仔話：「夾咗10年係一件好有意義嘅事！我諗我哋玩咗可能有過千場Show，大大小小嘅Show都玩過；但係第一次上頒獎禮嘅舞台！我會繼續做多啲好嘅音樂，希望可以重遇你哋多一次！」堅持10年，累積過千次演出經驗終於能站頒獎台，不只對ToNick，還是對整個Band Scene注入一支強心針。

ToNick在後台接受訪問時表示，能在主流頒獎禮得獎他們心情非常興奮，結他手小龜話：「係一個對自己嘅肯定，因為我哋由第一首派台歌係《What A Sunny Day》，都講緊接近10年前。今年真係好感恩，其實觀眾鍾唔鍾意你嘅音樂好講緣份，我覺得今年係ToNick同觀眾好有緣嘅年份！」恆仔又話：「頭先好感動！我哋4個好似出發咗好耐，好似一齊種一塊田，種咗10年，依家終於見到有啲發芽喇喎！同埋香港做樂隊嘅一齊努力！因為音樂呢樣嘢只要肯做嘅話，就會有佢發芽嘅一日！」

另外提到今次頒獎禮與Supper Moment同台得獎，大家一起成長到今日得到外界肯定，ToNick都非常開心：「嗰下真係好想大力攬住佢哋(Supper Moment)，以前一齊喺觀塘嘅大廈朝見口晚見面，一齊出騷經歷過嗰段時間真係好開心！」又講到：「佢哋之前一路都好努力，係我哋好好嘅推動力！其實係互相影響，正如有人聽完ToNick嘅歌會做一啲嘢，我哋見到Supper Moment行呢條路原來係OK㗎喎，掉轉有人見到ToNick做咗10年終於有獎攞，又會繼續玩音樂，其實好多嘢都係互相影響。」

Supper Moment連續3年蟬聯十大中文金曲的「最佳樂隊／組合獎」，今年與同ToNick一起得獎，他們認為這是一個里程碑：「係向住一個好嘅方向嘅發展嘅里程碑！」主音Sunny話：「我哋同ToNick、Kolor有一段時間經常一齊出騷，頭先一宣布佢哋個名嗰陣，嗰個擁抱好有份量，包含住好多畫面！好似返番去以前蒲吧喺後台一齊hea，大家互『gut』，一齊玩嘅畫面！」呢一份友誼好特別，大家喺音樂上都有一個方向去行，今年佢哋《長相廝守》呢首歌真係好好！我希望下年佢哋有更多作品得到大家嘅認同！」

鼓手阿達補充：「其實幾年前有人會覺得我哋慢慢步向主流，但係我哋個答案係希望可以唔使再咁樣去比較，唔使再『主流』、『獨立』咁樣就最健康！」

Bass手CK又話：「作為樂隊有機會可以行上頒獎台可以攞獎係一個肯定，希望樂隊唔係每隔10年出現一次嘅潮流。我希望依家有呢個肯定之後，一啲唱片公司，或者投資者可以多啲留意樂隊；多啲朋友會明白樂隊係一樣可持續發展嘅事。繼而可以感染到多啲人玩音樂，或者投身音樂行業，無論係Sound Engineering、Mixing、台燈聲，推動屬於香港嘅製作。」

既然樂隊文化近年開始備受重視，樂隊開始變得「有牙力」，Supper Moment會否計劃舉行音樂節形式的活動繼續推動本地樂隊文化？結他手阿雞話：「暫時賣個關子先……係有嘅！你估到一啲我哋下一步會想做嘅事！」主音Sunny補充：「但係要等一個好嘅timing，因為入面牽涉好多行政嘅嘢，需要好多時間去籌備。因為上次Clockenflap我哋出動晒我哋有嘅資源去做，發現連外國嘅觀眾都會respect，所以會有啲信心。下年應該係有一個少少嘅嘗試，行一細步。希望他朝有一日我哋咁多隊band可以聚首一堂，甚至連香港以外嘅單位一齊去搞。」