ToNick九展開騷有兄弟撐場 Supper Moment:真系值得支持一世!
![ToNick九展開騷有兄弟撐場 Supper Moment:真系值得支持一世! ToNick九展開騷有兄弟撐場 Supper Moment:真系值得支持一世!](https://cdn.hk01.com/di/media/images/1071537/org/a2e5f46841871d78d93ac74107210147.png/IImfcWOaTF7O2s6DL-dSAQ_5FpBA21BHshYG3LIWBtw?v=w1920r16_9)
樂隊ToNick昨晚在九展Star Hall舉行《不停站演唱會》,首次踏足3000人場館是他們的一大突破,難怪他們都感觸話:「我哋卡咗喺1000人9年喇!」無論是因為《長相廝守》才留意ToNick的樂迷,或是資深樂迷都一樣盡興,皆因為ToNick不同年代都有玩,如:《窮》、《雪糕糯米餈》、《講咩都錯》、《張飛留比我》、《發你個夢》,到近期的《阿飛與阿基》、《回憶備份》等等一應俱全,滿足樂迷不同口味。昨晚更邀請到Supper Moment作嘉賓,台上更播出7年前兩隊樂隊合唱《最後晚餐》及《瀨嘢》的片段,真系回憶返曬嚟。
![「我窮!我有風格!」(黃國立攝) 「我窮!我有風格!」(黃國立攝)](https://cdn.hk01.com/di/media/images/1071437/org/f99ec2a5f8957c1be525e6a78901ac7e.jpg/yj6q24Ut_7VqtpUNtyo6S2o__qDHl6nuDoiaDQ6Img0?v=w1920)
原來呢條片已經7年喇!
日前ToNick與Supper Moment在十大中文金曲同台得獎,兩隊兄弟Band齊齊攞獎實在令人鼓舞。昨晚他們再度合體當然要crossover,將《異相》及《飛》兩首歌完美融合,兩位主音Sunny與恆仔在台又跑又跳,頓時炒熱全場氣氛,所有觀眾跟住拍子一齊跳,就算置身觀眾席最後排仍能感受到Star Hall「大地震」。去到最後一次副歌Sunny與恆仔興奮得插水,台下樂迷當然自動波接到實。所以話,Band Show識睇嘅一定系睇Live,呢種氣氛真繫好難喺第二度揾到。
Sunny同恆仔high到插水!(黃國立攝)
合唱完《異相》x《飛》後,Supper Moment主音Sunny話:「如果你有一個朋友,令到你又喊又笑嘅,你要珍惜呢位朋友!如果你遇到一隊樂隊同樣令到你又喊又笑嘅,真系值得支持一世!」之後仲講到眼濕濕:「今日Supper Moment真繫好開心可以喺呢個台……見到ToNick 10年走入Star Hall!」頓時歡呼聲四起,然後Sunny一句:「送上呢首歌,返番去10年前!」接着唱出《最後晚餐》,一首陪眾多樂迷走過不同階段的作品。
如果有睇開ToNick的讀者都知道,以往每次演唱會都有「重點環節」就是鼓手晨曦唱歌,之後他試過拿起結他唱《活着ViVa》,昨晚他翻唱黃貫中《Can't Bring Me Down》仲rap埋一份;晨曦更形容自己是「在沙漠行走的魚」大放笑彈。
一個演唱會要有高低起伏先好睇,雖然ToNick大部歌曲都是熱血,很衝的感覺,但也有柔情一面。他們以acoustic形式唱出《善忘哥》、《阿飛與阿基》、《你對我已經唔繫好似以前咁》等等,更加入小提琴及鋼琴元素令編曲更豐富。
來到Encore環節,終於聽到《長相廝守》,恆仔跳落台走入觀眾席,相信有睇過《救僵清道夫》的樂迷腦海即刻泛起戲中不同場景,再配台上熒幕播放的動畫,營造相當感人的氣氛。感動過後到應節神曲《Last Christmas》,睇嚟好多樂迷都有「被走數」經驗,全場都聲嘶力竭大叫「還錢!還錢!」最後以他們的主題曲《T.O.N.I.C.K》劃上句號,相信大家都會記得那句:「起碼我做過!」
ToNick完騷後接受訪問,早前Supper Moment透露過希望聯同其他樂隊合辦類似音樂節的活動,那ToNick會否是其中一員?他們表示未知詳情,但有機會一定會支持:「想當年搞一個學校巡迴,Supper Moment都系義無反顧咁支持,到將來有好嘅活動點都要支持!」
首次踏足3000人的大場,ToNick 4人心情很激動:「呢個場地系我哋一路想開嘅場地,好多謝每一位買飛入場支持,我哋4個見到全場爆滿真繫好感動!」
《長相廝守》呼聲很高,早前又得獎,會否對此有壓力?恆仔話:「有壓力嘅,但真系要keep住平常心去經歷,因為完咗今晚接住都幾場show,又要準備下年嘅歌,所以要keep住個狀態系平靜,再努力做。好多謝支持《長相廝守》嘅每一位!」小龜補充:「有獎項當然好啦,但系其實今年都有好多出色嘅音樂人出碟,我自己都有聽,所以獎項就真系唔敢諗住,總之就係努力啦!」