【專訪】樂隊野佬打工做音樂夠隨心：搞騷蝕錢當去個旅行！

港產歌曲於大家心目中，來來去去也離不開情歌、勵志歌，再細分下可能有一些講述宅男心聲、港女心聲的題材，卻好像缺乏一些比較真誠直接的聲音。經常都說音樂的維度應該更廣闊，不過又有多少歌手、樂隊敢於面向自己，想唱就唱，不顧形象把自己麻甩一面表露無遺？由2002年組成雛型野仔，再到2012年改名為野佬，似是看著幾位初出茅廬的年青人轉眼間蛻變成在職場打滾多年，不時要飲酒抒發悶氣的中佬，麻甩中帶點可愛。即將舉行《大約在冬至》音樂會，就似是襯年尾前與樂迷一起做節，聊聊近況，又回憶一下當年。
攝影：陳順禎

近年在大大小小的音樂會中也不乏野佬的身影，不過大多也是與樂壇好友一起合辦，今次《大約在冬至》難得打正旗號是屬於自己的晚上，終於可以釋放一下，想點玩就點玩。所以今次樂隊成員特意打造主題，他們表示：「Book場嘅時候都覺得奇怪，而家咁難Book場，都咁好彩比我哋Book到12月22號星期五，後尾先發現，原來嗰日係冬至，唔怪得無人Book啦。然後我哋開始Brainstorm，既然都係冬至，不如就用嚟做主題啦，大家諗諗吓就諗起齊秦首《大約在冬季》，最後就決定成個音樂會都環繞九十年代嘅歌去玩。」雖然樂隊幾位成員聽歌各有口味，不過一提起九十年代的歌曲，他們又再次起哄：「我哋喺Band房每人都唱啲九十年代嘅歌，睇吓邊啲啱開騷唱啦，點知一首接一首，原來首首大家都識嘅。唔知係咪細個嘅記憶力特別好，一首歌又聽好多次，所以一哼就記得晒。」

今次演唱會，除了翻唱九十年代作品，當然野佬的私家歌也是不可或缺。身處樂壇，歌手找到自己的歌曲風格，甚至是系列是相當重要，例如陳奕迅有「男人玩物四部曲」，周柏豪會有「兵歌」系列。至於隊名亦稱Yellow！的野佬，其實也有屬於代表著他們自身的系列，當中最為出位的，應該也要數到「黃色三部曲」，《著襪浸溫泉》、《夫目前飯》、《時間靜止器》，可說是香港樂壇中，少之又少有人敢做的題材(男仕們看到歌名也大概會明白當中意思，不明白便很好很純真，不要踏進這領域)。主音小胡笑言：「其實我哋平時都幾鹹濕吓㗎！寫呢幾首歌嘅時候都係由麻甩嘅心態做出發點，不過麻甩唔一定要好核突或者成個阿叔咁，所以用呢啲小小甜、古靈精怪嘅主題去認真做歌，一樣可以係一件有型事。就算唔諗吸唔吸引人先啦，起碼自己鐘意嘛！」鼓手阿銘則表示：「其實我最細膽，初時我會話講鹹濕嘢好似唔係咁好喎，佢哋同我講要做返真正嘅自己，唔好有偶像包袱！」小胡即答咀問阿銘：「咁你會唔會上鹹網呀？」阿銘笑言：「咁都有嘅！」所以大家抱持著玩樂心態把歌曲寫下來：「我哋唔係鼓吹色情，其實大家都會有呢啲習慣，上網都會睇吓靚女，點解要怕做自己呢？」小胡續道：「其實呢啲音樂好正常，而家少咗人敢做囉。以前八、九十年代，劉美君都有好多呢類情欲嘅歌詞。去到而家冇乜人做，不如我哋去寫吓啦，大家都覺得過癮，反正呢個年代冇嘢係估計到成效，做返真實嘅自己係我哋最需要做嘅嘢。」

現時玩Band的圈子雖然百花齊放，不過跟八、九十年代的光輝期，總是好像缺少一些稜角。Bass手何兆基直言：「而家啲Band全部都好保守，可能好多現實因素影響，如果你走得太前太偏激，人哋可能唔搵你做騷，或者去唔到某啲地方做表演。我明白嘅，但樂隊真係要有啲稜角喺度，有自己嘅睇法先係樂隊嘅價值所在。」結他手Wilson補充：「又同媒體嘅模式唔同咗有關，而家主要都係網上買歌，樂隊要生存，音樂方向就要民粹，要近大眾口味。不過我哋野佬無乜所謂，因為我哋個個都有正職有人工，反而成為咗一個優勢去做自己想做嘅嘢。」

野佬成員夾Band為興趣，打工為糊口，反而這種模式成為他們最舒適的狀態，亦創作出多首「打工仔心聲」，由早幾年的《上面話OK》、《鬼叫我窮牙》，再到今年的《老佛爺》，樂隊成員一直在控訴職場上的畸型生態，盡訴一眾食物鏈最低層的打工仔心聲。阿銘表示：「我哋幾個都有返工，其實每個行業都有呢啲負能量，有人唔知自己失敗嘅原因，有人唔明點解隔離嗰個升職但係自己冇份。而今年我哋都出咗首《老佛爺》都好寫實。」Wilson補充：「其實呢首歌係講辦公室入面嘅刷鞋仔，某程度上呢類人係放錯重點，將個工作焦點放咗喺人際關係上面。就好似我哋做音樂嘅，應該係將個重點放喺音樂入面，但如果我哋走去做一啲同自己工作完全唔相稱嘅嘢，咁件事都好無稽。」