鍾舒漫一首歌拍足4個MV　其實音樂都應該「Be Water My Friend」

已故武術大師李小龍先生曾講過：「Be Water My Friend」，意指水能隨容器的改變，而作出形態上的變化。而套用在人身上，人亦應保持着本質，因應環境變化作出應對。在武術如此「有形」的事物上也能「Be Water」，何況是在「無形」的音樂上？鍾舒漫早前推出《Be Water My Friend》，引用了李小龍的這句金句，把水的多樣性放在新歌當中，原來表達形式也可以不止一種。

《Be Water My Friend》是由王雙駿與鍾舒漫共同打造的歌曲，比起王雙駿近年大玩電子風格，今次新歌編曲上卻回歸80年代Funky色彩，Sherman表示：「香港好少機會聽到Funky嘅Style，而我同Carl叔叔（王雙駿）嘅共通點係大家都好鍾意80年代尾到90年代嘅音樂，當時嘅Hip Hop Beat、R&B，都係我哋經常聽。所以Carl叔叔覺得我應該將自己鍾意嘅嘢放落去。」

由《從不信自己》到《隱型》、《小碎步》，再到今次《Be Water My Friend》。Sherman今年用4首歌去敘述有關「真我」的課題，其實香港絕對不乏勵志歌，以至近年可說是其中一個大熱題材，於Sherman來說，4首歌其實也在說自己：「勵志歌其實可以有好多款，有啲係明顯地叫你唔好放棄，有團火燃燒住咁叫大家『加油呀、加油呀！』但除咗呢種方法去演繹，其實仲可以有好多種題材同形式，所以陳詠謙幫我用《Be Water My Friend》概括咗我心入面諗嘅嘢。」《從不信自己》講初衷；《隱型》則是尊重自己的真本性；《小碎步》訴說每人也有屬於自己步伐；再到最後《Be Water My Friend》，在模造自我的過程中，如何在改變當中保持自己本質，大概便是今年度鍾舒漫音樂上的一個概括。

「我哋可以係杯　可以係樽　可以係茶壺肥又矮」大家以為這句歌詞只是唱唱而已？不過同一個題材，Sherman可以用足4首歌去敘述；同一首歌，她更可以4種不同形式表達。為了《Be Water My Friend》，Sherman除MV以外，更拍足4個Art Project短片，分別以 「Graffiti Writer」、「Drums and Keyboard」、「Beatbox Version」、「Tricking & Martial Arts」4種不同藝術重新編排及演繹《Be Water My Friend》，走出音樂以外的框框。

今次《Be Water My Friend》強調，人的存在不應只有一套風格。把這套放到香港樂壇身上，就像老生常談：「香港嚟嚟去去都係得K歌，歌手個個都差唔多。」儘管今次推出新歌落了120%的力，卻未必有相應的迴響，但Sherman把今次的經驗當作是教育一部份，「廣東歌比起韓文、國語、英文係難唱好多，因為要一隻一隻字唱清楚，如果你用其他語言嘅唱法，大家會覺得你唱唔清楚、廣東話套得唔好、唱唔到廣東話嘅味道。久而久之，大家都會用返同一種方法去唱，出同一類型嘅歌，先會有人聽有人鍾意，所以唔敢出其他歌。不過表達係每個人都唔同，每個人都應該有自己style去唱廣東歌，可能開頭未必人人接受，但當個風格出咗嚟之後，大家就會開始適應。其實每個新文化嘅開始，都需要時間同過程俾人適應，而香港可能有好多唱片公司同歌手，就係頂唔住呢個過程，試咗一首新啲、得意啲、自由啲嘅歌，但一旦出現反對嘅聲音，大家就決定放棄啦，結果轉嚟轉去都回歸原點。」大概香港樂壇的悲哀也因而形成：「大家聽嚟聽去都係嗰啲歌、香港都係要呢啲Style、咁做音樂先work。」這些年來，同類說話的確聽過不少，所以Sherman希望打破香港的速食文化，先要由自己做起：「認識好多行內人都好想打開自己，將本來就好擅長好喜愛嘅Style帶出嚟，但又好似好多掣肘。所以今年我有少少豁出去，做返自己，所以件事好開心，亦做得好有動力，希望帶動到其他藝人都有呢個膽量將自己鍾意嘅嘢做出嚟。」