【專訪】有天外智慧𥄫到實？　夏韶聲：人在做天在看

夏韶聲於60年代由舞廳當樂手出身，試過被領班摑到流鼻血；「因為我都係Band仔出身嘛」一句令夏韶聲成名後，仍會替Band仔、樂手出頭抱不平。時至今日keep住咁有火，沒有停下創作步伐，本月將推出概念大碟《2020 Arrival》；率先派台歌有《沉睡啟示錄》，向樂迷展示「夏韶聲的世界觀」，但原來新碟的概念早於11年推出的漫畫《天眼》中已有伏筆。

夏韶聲常說「人在做、天在看」，是意味有一雙天外的眼在監察人類的一舉一動，令他有靈感創作新專輯？夏韶聲解答說：「我借助呢個concept，俾大家檢討一下，由一個天外智慧，透過佢隻眼睇下我哋凡人做嘅嘢，我哋係咪要檢討下呢？」

要檢討的事實在太多，新碟《2020 Arrival》中《沉睡啟示錄》可說是一個序章，其他歌曲提及戰爭、社會動盪，色彩灰暗，到底何事令夏韶聲有感而發？

他表示：「舉一個例，打咗5年內戰嘅敘利亞，出動到冇人肯認嘅化武，你話如果你係嗰度嘅一個人，真係喊就可以得喇咩？嗌就可以聯合國就可以嚟喇咩？你睇下聯合國喺波斯尼亞做到啲咩？實質上乜都做唔到。仗照打，人照殺。」

戰火無情，導致生靈塗炭，令人類身處的地球逐漸崩壞，所以夏韶聲想以天外智慧眼觀察地球的概念，提醒人們要檢討、反省。MV中夏韶聲所戴的面罩就是代表天外智慧的眼，而他戴着面罩觀看四周就是在表達這個意思。

那面罩原來有段故，夏韶聲解釋：「係一個巧合，我去三藩市去玩嗰陣見到呢個面罩，我睇到佢嗰陣我已經諗到，我可以用佢嚟做一啲嘢，咁就買咗佢。」他續說：「我揸住面罩就靈感到，我諗到『Arrival』，佢哋嚟到係點睇我哋㗎呢？我就透過呢面罩隻眼睇出面，就當佢哋落咗嚟喇，就算我喺MV入面戴住個面罩，面罩後面嗰個人，個意識都係天外嘅人。」

既然眼罩是神來之筆，靈感的重要來源，想定必是價值連城的藝術品，答案竟超出預期。夏韶聲表示：「好平㗎咋！好似係27蚊美金，哈哈！其實我可以呃你哋，但唔需要咁做。」他又慨嘆：「做得咁靚都係賣廿零蚊，你諗下，咩叫做藝術呀？」

同為音樂人，看見一件品花盡心思的藝術品售價也只是27美元，夏韶聲會否感同身受，覺得作為藝術家很「命苦」？豈料他從不喜歡「藝術家」的稱呼。夏韶聲謂：「首先有呢個心態要打咗蘿柚先，點解你要考慮自己係藝術家先呢？」

曾經有人以「藝術家」稱呼他，換來只是自討沒趣：「有人同我講『夏韶聲，我就好似你咁，係一個藝術家』，我以後都唔想再聽佢講說話。我聽到覺得唔鍾意，第一，我唔係藝術家，我係一個凡人，咩嘢叫藝術家呢？如果佢以為佢係藝術家呢，就太過抬高自己喇！」

話說回來，到底「2020年」對夏韶聲有何意義，重要得成為專輯名稱？原來與他一直有研究的天外智慧、以及漫畫《天眼》有關。夏韶聲表示：「2020年，夠啦，『佢哋』(天外智慧)係咪真係會出現呢？我諗你知道我講緊乜嘢嘅「佢哋」(天外智慧)，其實『佢哋』一早已經出現咗，甚至可能我哋未喺呢個地球度行嘅時候佢哋已經喺度。」夏韶聲又提到，2012年發現兩艘大型太空船，雖然未知是否駛向地球，但有說它們到抵達太陽系，並停在月球背面。他借助這個概念，當來到2020年，『佢哋』到達地球，會帶人類離開，還是有其他結局？留待樂迷聽過專輯後自己領悟。

原來「2020」還有另一個意思，夏韶聲打趣道：「呢張唱片係2017年出，我可以捱到去2020年，到2020年呢張都仲係新碟！」既然夏韶聲對新碟充滿信心，樂迷便拭目以待3年後會有甚麼變化，說不定到時再聽《2020 Arrival》會有另一番體會。