蔡思貝不介意同達哥撞樣 最嬲係被改名：覺得有啲唔尊重！
蔡思貝近來的評語傾向正面，向來有個句講個句的網民，見到她都不禁講句：「佢靚咗好多！」、「佢越嚟越靚喎！」，就算新劇《味想天開》出街，見到蔡思貝的胡人辮仔look，都好多人話搶眼，越來越多人讚，看來蔡思貝慢慢行緊運。
攝影：黃國立
不過，總會有人將蔡思貝與網絡紅人達哥拉埋一齊講。其實女仔被人笑似男仔，或多或少都會有點唔開心，始終有邊個會想女生男相先？而蔡思貝坦言最初有唔開心，但並非因為自己似男仔：「之前都有人話我同好多人似樣，似陳煒、梅艷芳，木村拓哉，又或者係達哥，我都無所謂，」對於外貌相似，蔡思貝都幾睇得開，不過她最介意被人直接稱呼為達哥，甚至是「蔡思達」，將兩人混為一體，「其實話似，係冇問題，但如果我似陳煒，你都唔會係我度留言叫我陳煒㗎嘛？其實我覺得有啲唔尊重，That's not my name，我媽媽改名叫我做蔡思貝，就一世都係蔡思貝，而唔係其他名。」其實蔡思貝同達哥有同場出現過，當時都掀起過話題，蔡思貝事後表示：「我唔介意一齊出現，都係Gimmick，有錢齊齊搵係開心嘅，但就唔好將我哋Mix Up。」
除了事業、達哥，最想了解的還有蔡思貝的感情事。近期都有傳媒講到她與排舞師麥秋成的感情若即若離，咁係咪真有其事，有感情危機？蔡思貝都係個句：「不如專注返我的事業啦！」難道係真？她續道：「一路以來我都冇對外講過感情事係咩狀態，目前我都係專心事業，大家問起我都係講『多謝關心』，將來去到結婚個一步，就話畀大家知。」
蔡思貝對於感情採取低調態度，源於她事業未有成：「工作需要努力去完成，但感情其實唔使點落力去做嘅時候，加上感情實在有太多變化，今日可以好好，第二日可以鬧交，所以唔代表啲咩。」總言而之，性格獨立的蔡思貝，在事業有所成就的情況下，就會考慮結婚。
新一年新願望，係好老土，但蔡思貝就有個獨特的想法：「希望新一年可以愛錫自己，過往係情感上、身體上都有呢種諗法。一個人如果要係人地身上得到快樂，咁並唔係真正嘅快樂，因為係靠人而得來，就有啲似寄生蟲咁去得到養分，希望自己可以供給養份、快樂畀自己，係好難做到㗎！但都想自己做主體，係一個achievement。」希望Sisley真係做得到啦。