蔡思貝上位快負評多 25歲女好豁達：以後咩都唔使驚！
2016年已結束了，不論大家有甚麼好事、壞事，2017年應該重新洗牌。對於蔡思貝來說，新一年希望「大家會開始接受蔡思貝呢個演員」。因為TVB新劇《味想天開》話咁快要打頭陣，已經出街。蔡思貝在《味想天開》飾演行走江湖多年兼身經百戰的豪邁女子石柔，為幫爛賭阿媽（韓馬利飾）頂數，經常要扮鬼扮馬。現實中，入行短短數年的她，同樣經歷不少，與石柔都好像幾似。
攝影：黃國立
每次蔡思貝有劇出街，觀眾自然地評論她的演技。她對此無求甚麼，只求「觀眾會接受蔡思貝呢個演員」：「其實每一套都有人鐘意同唔鐘意，其實都唔應該focus on負面上，自己都會感恩，到後來做《純屬意外》，大家都會畀好嘅comment我，所以我都唔應該無視正能量，希望大家睇完呢套劇唔會由鐘意變唔鐘意啦。」其實《味想天開》是喜劇，觀眾都不如輕鬆啲啦！
講起演技，都有網民將她與同屆港姐出身的陳凱琳及劉佩玥比較，但蔡思貝就覺得，大家戲路都非常不同，如果要比較都很勉強與不公平。唯一相似的地方，她認為與陳凱琳的遭遇都很相似：「大家的經歷都差唔多，都係好努力去工作，同樣受過外來的攻撃，有時都幾不留餘地。所以每次大家都有劇出街嘅時候，都會好擔心今次又會點呢。久而久之都會互相去扶持、鼓勵對方。」
與陳凱琳感同身受
除了與陳凱琳的際遇相似外，蔡思貝出道短短3年，被批評演技聲線之餘，多次傳過緋聞，而且低處未算低，最轟動一時的就是2015年爆出的假學歷事件，壞事不斷。對於現年25歲、年紀尚輕的她，會否覺得這一切比別人來得還要早？「對我嚟講，係困難嘅，但同時都係正嘅，因為拿拿臨打完大佬，你以後咩都唔使驚嘛。」
經歷過後說這句話，是樂觀的，但一切回到原點，當初蔡思貝人緣不差，更有不少人看好過她，後來一度向下沉，面對這樣落差，她坦言曾經問過自己：「點解係我嘅？」，「但係事出必有因嘅，都有諗過自己係咪得罪咗咩人，可能講錯嘢。而且啱啱出道冇乜諗太多，種咗啲因喺度，咁而家咪有果。」性格爽直並不是罪，而過往外界儲下來的誤會，蔡思貝希望隨著時間而化解，「其實唔少人同我合作之後，都會話：『同你做嘢，識咗你之後，都唔係我諗咁樣喎，係正㗎喎，OK㗎喎，咁我都會覺得好欣慰。』」面對那些流言蜚語，蔡思貝默默地讓人發現真相，不會刻意營造，也不會開口說委屈，她依舊爽直：「唔通我要特登Call個記者影我幫阿婆過馬路？」如她所說吧，希望時間會證明一切，因為坦率真的沒多少個會做到。
學歷事件
時間會證明一切，同時都會有人想尋根究底，「假學歷事件」亦不例外。蔡思貝於2015年被揭發以虛假學歷和入學日期領取畢業證書，事情如今仍留下懸念。事隔年半後，蔡思貝選擇這樣回答：「當時講過嘅都講過，有口難言嘅到而家都係有口難言嘅時候，你問我都係一樣答案。你唔問我，由頭到尾件事都冇變過，我自己知道發生過咩事，咁就OK。」不過，世界上總會有人喜歡尋根究底，蔡思貝面對這種情況，會給予甚麼答案？她說：「唔緊要㗎，未係時機啫，可能十年後同大家講發生咩事呢？都得㗎，可能未係時機啫。」或許蔡思貝覺得時間是最佳的解決方法，對於大眾來說，想得出結論，唯有等待了。
浸過下鹹水的蔡思貝，今次第一次拍古裝，最擔心的事是怕自己「太Yo太現代」，「拍嘅時候都諗，做嘅動作同講嘅對白會唔會太唔似古代呀？咬字方面都要字正腔圓啲，不過我飾演一個胡人，所以有時可以唔洗咁正。」除此之外，雖然蔡思貝劇中外表粗豪，但都有嫵媚一面，「劇情會講到我會跳胡舞搵食，我都有事前準備下，練過跳舞。」
第一次拍古裝劇，亦是與洪永城首次合作，蔡思貝笑言與對方差點大打出手，咁驚？「因為大家對拍戲都係有主見，有時會有不合，會爭拗上幾小時，最後都要導演去調停。」如此大火花，對於兩人在劇中要飾演冤家，絕對是好事，因為襯返晒劇情。問到拍戲時已同對方傳過緋聞，劇集出街之後，又驚唔驚傳多次？蔡思貝就話：「傳得就代表大家有留意套劇，咁之後如果可以拍住去搵真錢，咁幾好呀，我未試過熒幕情侶檔去搵錢㗎。」不過，洪永城已經名草有主，想一齊搵銀就難啲了。