【異搜店】吳業坤同陳曉華演情侶　自加拖手戲唔怕被人話抽水

吳業坤（坤哥）今日（25/9）現身電視城出席無綫（TVB）新劇《異搜店》拜神儀式。早前坤哥自爆在劇中將會同陳曉華有親熱戲，但開拍至今成兩個月時間，仍未安排拍攝，他心感被騙說：「其實由試造型嘅時候，一路講講講講到而家兩個月之後呢，都仲未有，心諗係咪氹住我先？不過一日未到最後，都未知結果。大家亦都知我為咗呢場戲，同屋企隻貓練咀戲，又同自己練習，上唇錫下唇，真係落足心機㗎！」

另外，坤哥亦透露同陳曉華做對手戲時學識加戲，問是否學洪永城加咀戲？坤哥即劃清界線，並口震震話：「咦，我唔知喎，我唔係好了解喎，但就知道有時候有啲對白好Sweet但劇本冇寫，到拍嘅時候我會加少少拖手，又或者搭膊頭，增進情侶之間嘅感覺。（怕唔怕太入戲，情到濃時加咗咀戲？）咁我又唔會咁大膽，始終呢套劇唔係愛情劇，咁所以都唔會太過集中喺呢啲霎眼嬌嘅嘢上面。」