雨僑做KOL好搵過做藝人？　坦言：10年前無諗過可以成為工作賺錢

雨僑 (Ava) 同老公羅力威度早前蜜月期間，經歷颱風「飛燕」吹襲完日本大阪後，成功安全返港，現已重新投入工作。Ava有感而發表示：「天災係離我哋好近嘅事，遇到突發情況要識得應變同執生。」對於有港女因為北海道地震致未能入住已付款的酒店房間而大發爛渣，對此Ava說：「都明白佢嘅感受，係辛苦同唔抵嘅，但真係無辦法，咁啲災民都好需要幫助。」

已經成為人妻的Ava婚後依然繼續她的演藝以及KOL工作，就算將來生了B後都一樣，她說：「自己工作9成半係KOL嘅project，覺得婚前婚後都無咩大分別，可以講下自己真實嘅生活，以前就少啲講另一半，依家可以講我有個老公，又無話特登要有啲咩定位，例如要講夫妻或者新婚生活呢啲，都係隨心做，隨住自己生活去做。我嘅工作性質係去到邊都可以做到嘅。」

入行至今10年，雨僑雖然早已轉戰KOL界主力做KOL的工作，演藝方面的工作相對較少，不過她仍選擇跟公司續約繼續做藝人，她說：「老實講，我嘅演藝事業發展係咪好到需要繼續落去呢？大家都睇到啦，不過我始終認為做KOL之餘係需要有份工嘅，如果我嘅生活費完全只靠介紹產品而嚟，就會好容易迷失。自己做KOL一定會試真個產品先去介紹。」面對愈來愈多做KOL，競爭劇烈，作為本地最初代KOL的Ava說：「個市場好大，我由10年前無咩人做開始，嗰時覺得做藝人有多個渠道畀人認識自己係好事，無諗過可以成為工作賺錢，依家係多咗競爭者，但亦有同行者，公司亦都比以前明白我做緊啲咩，都會盡量配合我。」

提到她和老公婚後都想生BB，Ava坦言並不急的：「其實可以二人世界下先，試下點管理好一頭家先，我哋都有各自嘅分工，例如我負責煮飯，佢會幫手做家務。喺香港如果兩夫妻都要外出工作，好難唔請工人姐姐照顧屋企，但係我哋就無請姐姐，都希望將來可以親力親為照顧小朋友，依家正朝住呢個方向努力。」

Hair：Adam Hui @ W Salon By Il Colpo
Makeup：Lisa C. @ Lisa C. Makeup Art
Outfit：Spark Fashion
Location：Prince Hotel

一齊睇下Ava啲靚相啦。