與羅力威滯留大阪勁頭痕　雨僑：機票同劉德華演唱會飛一樣難買！

颱風「飛燕」吹襲日本，令大阪關西國際機場關閉。身在當地旅行的雨僑與羅力威亦受影響，原定7號回港的他們仍然滯留大阪，走投無路。所以，他們決定自行再買機票回港。雨僑憂心表示：「現在當地情況很亂，公共交通工具都冇位，連車都驚租唔到，所以要走的話，唯有改飛宮崎，這是最好的辦法，東京、福岡和名古屋機位也要排到10幾號，票價已升到萬幾蚊一張，跟買劉德華演唱會飛一樣，一票難求！」

雖然雨僑一行五人是最後訂到宮崎那班機的乘客，但一波未平，一波又起：「最黑仔的是我們五個都沒有帶國際車牌，即使有車有開不得，惟有四處「撲」車！JR要轉四五程之餘唔係近，要推住幾個喼，都要搭大半日車。搭巴士就要一晚通頂坐十三個鐘，但一上一落就到宮崎。其實我唔敢包宮崎走係「最好」嘅選擇，只係咁啱好彩有5個機位同所有公共交通工具嘅位，最適合我哋，而且價錢合理！」

經過連番頻撲搶機位、搶車位後，雨僑終於撲到內陸機票去宮崎stay一日。腦筋急轉彎的雨僑猶如中獎的說：「總算鬆一口氣，內陸機都近嘅，兩程機都收到confirmation㗎喇。連日來在大阪街頭沿途撞到好多香港人，喺餐廳大家都好似相識嘅朋友一樣，傾下點返香港，大家都有不同選擇，有啲有小朋友、老人家都唔想去咁遠。難得逃出生天，索性喺宮崎book咗個resort靚 hotel，當玩多日補償！」雨僑又透露現在市面已陸續回復正常，航空公司亦開始陸續聯絡旅客。