【專訪】多功能藝人蕭徽勇拍劇配音瓣瓣掂：最初根本冇諗過入行！

相信大家都知道，大台人工向來偏低，令不少藝人離巢，或轉戰內地搵人仔，但仍然有一班人留守，默默耕耘。入行至今17年的蕭徽勇（Gordon）在大台擔任過不同的崗位，例如綜藝節目、兒童節目、拍劇、配音，統統都做過。可能大家都記得他熟悉的臉孔，卻不知道他的名字。直至他近月在「Big Big Channel」公開挑戰60天蔬果汁斷食大法，勁減60磅，才得到大家的注意。

【專訪】蕭徽勇蔬果汁斷食大法60日減60磅：一定要做足事前功夫！

發現幕前真理：瘦嘅演員機會比較闊！

Gordon接受《香港01》訪問時透露，事緣去年5月因為身體出現問題而入醫院，令自己杓起心肝減磅，更沒有想到自己在減磅的過程中能夠同時幫助到有需要的網民。問到可有想過，因此而令自己帶來更多幕前演出機會，他笑言當時純粹因為健康問題而減磅，因為若果再不注意健康，都不知道日後可以多活幾多年。不過Gordon都明白到任何行業都會以貌取人：「相信觀眾都會比較喜歡睇啲靚嘅嘢，唔係話肥一定唔靚。有朋友會問，以後啲肥人角色邊個做？隨緣啦， 發現真理就係，一個瘦嘅演員演出機會比較闊，劇組會覺得有肥人角色就會諗起我，變咗好似得我咁，專做肥人好似殺出一條血路。」但原來，Gordon一開始根本沒有想過入行。

陳志雲搭路　同余文樂一齊Casting

小六開始到澳洲讀書，直至大學畢業，之後一直都在當地擔任電台DJ，但發現澳洲電台發展空間愈來愈細，碰巧知道商台招募訓練班，所以就決定回港發展。很可惜，理想跟現實往往都有很大落差。完成商台訓練班後，本來雄心壯志一心想做DJ，卻沒有後續，所以便開始接觸舞台劇。當時認識了歐錦棠太太萬斯敏，而踏上學配音之路，坦言：「同埋始終做DJ出身，個滿足感大啲，諗住DJ冇得做就繼續向聲音發展，配音又冇事發生。講真，都有啲徬徨，要同家人有個交代，去到最後選擇就考藝員訓練班。」同時在商台認識了陳志雲，由對方搭路去了大台Casting：「同期有李霖恩、余文樂，隔咗兩星期後，就問有沒有興趣入訓練班，我都冇得揀啦！一係入訓練班，一係返澳洲，覺得澳洲悶，所以就咁就一世喇！」

做兒童節目舒服又好賺

加入訓練班後，反而沒有機會做主持，先參與綜藝節目後接觸拍劇，當時死屍、兵、任何角色都做過。直至2006年在台慶劇《東方之珠》中所演的「阿旺」有很大迴響，而被兒童節目監製睇中：「嗰時爆show，生活好穩定。其實係好舒服，但慢慢又改朝換代，好僥倖冇被調走。08年開始落配音組幫手，但同時做緊兒童節目。當時好忙，但忙到太充實，幾乎在公司過夜！」

【專訪】蕭徽勇面對網民質疑一一解答   強調蔬果汁斷食亦要做運動

不停轉部門   尋找生存價值

提到在大台擔任過不同部門，經歷過拍劇，兒童組解散，再調去配音組，問到是否一直在大台不斷尋找方法生存？Gordon笑言幸好有很多機會都是別人給予的，但確實有因此而感到灰心：「有諗過好慘俾人掟嚟掟去，同埋我從來冇諗過做嘅嘢，全部都做勻，我唔知下一步係咪去做清潔。嗰時都覺得自己做兒童節目命不久矣，開始覓定後路，我又愈來愈肥，自己知自己事。」

Gordon直言從來沒有想過踏進電視圈拍劇、做兒童節目及配音，問到接觸演戲後，滿足感是否比過往大？他即笑指，每個人只要有人稱讚就會感到有滿足感，但沒有人賞識的過程中，都累積了很多經驗：「拍戲要顧及好多外在嘅嘢，演員首要就係熟對白，但呢樣嘢有好多人都做唔到。第二就係守時，但基本野有好多人都做唔到， 加上有好多環境因素，你要學嘅技巧有好多，呢啲只係基本。若然這些都冇，可以發明星夢但唔好做演員，演戲同年紀、閱歷有關。」