【蝸居宅急變】用舊樓突顯翻新效果勁低招　廁所變溫室意義何在？

一連五集嘅《蝸居宅急變》終於去到尾聲，以為自稱「家居創意達人」嘅Queenie會使出渾身解數，結果原來係「運吉」。又或者咁講，節目分別搵嚟兩個舊單位，話要幫業主翻新間屋，但奇就奇在只進行局部（如廚房、洗手間）翻身，到底係能力有限定資源有限？就只有留待大家去判斷了……

最新一集Queenie首先去到一間有三十幾年樓齡的公屋，業主話個廚房又賤又舊、天花經常跌灰，如果要裝修起碼要廿幾萬，負擔好大⋯⋯先唔好理會呢廿幾萬點計算出來，只見Queenie不停提及呢個廚房又殘又舊兼油漬斑斑，但經過一輪粉飾（油磁油、鋪膠地板）後，即時靚晒。但換個角度去諗，油上白色磁油後，自然能予人煥然一新感覺，而最大功臣其實係裝修師傅而非Queenie，最好笑係個業主嘅一番說話：「多謝個節目揀中我，好似中咗六合咗。」呢個對白會唔會太過over？

Queenie之後去到一間400呎舊樓，並且表示：「裡面的裝修好《花樣年華》，尤其是廁所，化妝同沖涼都唔開胃，到底有咩辦法用最少資源令地拖變Dior？」她又指由於係租樓關係，所以無需要花太多錢去裝修，於是她提議：「油磁油同鋪地版！」但今次呢個動作係喺廁所進行！其實情況就有如化妝時用上大量遮瑕膏，醜女都可以做索女。而「化妝」呢個動作，今次再度落在裝修師傅身上！

Queenie仲有其他作品：

【蝸居宅急變】570呎都叫蝸居？　Queenie今集冇斷捨離積極添廢

【蝸居宅急變】到底係DIY定製造垃圾？　300呎蝸居掛鹿頭上去做乜

而Queenie就負責裝飾，搵來佢最愛的紅酒箱同大量盆栽植物，即時令廁所有森林嘅感覺，而啲花草更多到連擺放毛巾或其他雜物嘅地方都無！有網民話話好搞笑，其實洗手間濕氣較重，大量擺放植物豈不是更易滋生蚊蟲？不過最重要係，明明油磁油加鋪地板只需二千元，但最後就因為Queenie「添廢」關係，承惠七千大元！節目如果最後可以搵個租客講幾句，相信絕對有助收視。