【蝸居宅急變】570呎都叫蝸居？　Queenie今集冇斷捨離積極添廢

「Cheap but Stylish」係今集《蝸居宅急變》嘅主題，由於完全無斷捨離呢個動作要執行，所以Ann姐無出現過，全集由Queenie擔大旗幫兩間屋做家居佈置，熄電視指數達一百⋯⋯
何謂「cheap but stylish?」講得好聽啲就叫網購，但其實咪又係淘寶，不過講到淘寶，相信唔少香港人都係專家級數，又即管睇下Queenie呢位家居創意達人會點玩。

Queenie首個任務係幫少女控人妻，將奶奶送賺的私人樓打造成烈豔紅唇粉紅博物館，見佢由淘寶入手大量shocking pink家具，如地氈、毛毛燈、鏡、窗簾、閃閃電話等等（無包郵但包咗隻活生生嘅小強）花費約為8千大元，只見女户主每開箱一件新家具都用高八度聲線表示：「好靚呀！」，相信真係好滿意。

不過男户主待粉飾過後，入屋時一副汗顏表情，再睇清楚全屋都統一shocking pink色調後，都不禁講咗句「咁誇張！」相信人哋老公當下心中所想的，如網友所講︰「如果將光管轉埋做粉紅色的話，同一樓一都幾似。」嗱，係呢方面，Queenie早就閂定後門︰「設計嘅嘢最緊要自己鍾意，唔使理人點睇。」叻！

相關文章【蝸居宅急變】到底係DIY定製造垃圾？ 300呎蝸居掛鹿頭上去做乜

節目下半部分，Queenie為570呎嘅清水樓做家居佈置（同節目名《蝸居》好大分歧）呢個位於啟德一號嘅豪宅入場費最少都要500萬起，但Queenie一於少理，繼續網（淘）購（寶）家具，她更不時表示「呢啲喺歐洲買至少幾萬元，但我淘返嚟唔使幾百元」淘寶應有萬有，山寨貨就當然係平啦。最後，Queenie花費4萬多元裝飾了全屋，但住豪宅用淘寶貨，呢個係咪大部分業主嘅寫照？豪宅主人入屋之後，只係用好平淡嘅語氣表示「好靚」⋯⋯呢個反應相信係出於害羞。