【果欄‧黃嘉樂‧專訪】北上發展遇公司財困 獲TVB拯救做親生仔
《果欄中的江湖大嫂》終於大結局了，劇情發展其實有不少催淚位，尤其是勇哥（黃嘉樂飾）死去的時候，小狼女（馮盈盈飾）的爆喊演出，多麼動人。其實黃嘉樂在今次劇中也是發揮出色的一人，飾演一名退隱的江湖大佬十分入形入格，能夠演繹出這種唏噓的江湖味，當然人生也要有如此的經歷。
曾經在訓練班出來後便一帆風順，可惜自己年少氣盛並沒有好好把握，在TVB打滾多年依然只是做「細佬」的角色。毅然北上中國發展，正當打響名堂之際，卻又因為經理人的問題而前途盡毀。好在這時娘家TVB一個電話，嘉樂立即像抱到了救生圈，重回香港，更首次簽下TVB的經理人合約做親生仔。
黃嘉樂，相信有收看TVB的人一定會認識他，說到底，他在TVB已經17年了。由2001年到現在，他從訓練班出來後便一直維持著年年有劇上，但原來當初入行並不是自己的初衷，他說：「我當時做電訊業，有一日，藝員科有個電話壞咗，就叫咗我上去整。上到去個藝員科嘅人拎咗份表問我有無興趣讀訓練班，可能嗰時比較小鮮肉feel啩？但當時我係拒絕咗嘅，自己都唔係立志入演藝圈，雖然有做兼職模特兒。到佢第二次又問我，咁我嗰陣又後生，受唔住引誘，就入咗行。」
雖然重戲份，但當年一個新人又點會好識做戲，所以很自然地經歷滑鐵盧。回想的時候，他說：「其實做路人甲係有好處，你先知啲鏡頭擺位，自問唔係天份高嘅演員，當然係撞板多過食飯。好彩當時所有前輩都無俾壓力我，仲好耐心咁教我。無奈天資有限，嗰時錯失咗好多機會，開始做返路人甲嘅角色，一段時間之後開始覺得自己做緊咩呢？我同自己講要努力喇喎，嗰時先覺得自己係真正起步。終於做做吓等到有機會做《青出於藍》，好專心好勤力，因為一路拍一路個劇本都寫緊，當時小青姐慢慢加咗我嘅戲，之後亦都拍咗幾部小青姐嘅劇，就一路到而家。」
在2011年，嘉樂做了一個對自己事業有很大改變的決定，便是北上中國尋機會，更簽下當地的經理人公司，他說：「因為嗰段時間我已經做咗好多『細佬』嘅角色，嗰時已經有好多監製或者觀眾已經入咗腦，我就諗點做先可以令到人覺得我有轉變。而咁啱出面又有出面嘅經理人公司搵我，話會喺大陸開幾多劇，咁我就心動，結果我就簽咗。但因為嗰間公司出現咗啲問題，我係要同我當時嘅經理人不停喺北京叩門試鏡，用咗一年時間，其實我無所謂嘅，因為演員試鏡係一個好合理嘅行為。終於得到一個機會，就係《媽祖》，都算係多戲份，第一套之後就開始打開咗大陸嘅缺口。坦白講，你唔夠知名度，除咗不停試鏡，如果唔係都幾難話一定有劇開，除非打咗個缺口。」
不過拍完《媽祖》後，他在中國的發展便停滯不前，但卻不是因為自己的問題，他表示：「當時經理人比較貪心，因為《媽祖》係中央電視台拍，雖然而家無咁勁但始終係全國性。佢就拎住呢樣嘢開個價就有啲過份，開成一倍有多，成十萬一集，《媽祖》嗰陣我只係幾萬，我已經好開心㗎喇。就係因為呢件事，我覺得當時嘅經理人係浪費緊我嘅機會，你睇好我唔係問題，但唔好開天殺價。我都同佢講不如拍多幾套，等多啲人識我先，之後拍咗少少大陸、台灣電影，簽咗約俾人始終都係人哋控制。整段時間就係兩三年左右，但當時間公司喺最後一年因為資金周轉不靈，但我仲有一年約，嗰年就搞到好慘喇！（大陸）又無工開，TVB又以為我走咗，爸爸嗰時又身體唔好，好徬徨。」
好在，這個時候娘家TVB拋出了一個救生圈，適時拯救了這個迷途的小伙子，「其實舊經理人公司係有月薪，但去到後期開始唔準時，大獲喇，咁大個仔都未試過咁樣，嗰陣TVB份約亦唔係月薪制。好彩嗰陣佢唔同行最後一年合約，有啲嘢真係好感恩，嗰個時間才叔（梁材遠）就打嚟叫我拍《守業者》，我即刻答應咗。我仲問才叔可唔可以包我多啲戲份，咁就多啲錢，捱過咗段真空期，之後就簽返TVB，第一次簽經理人合約。」回想起這段經歷，絕對是一個變幻無常的人生，難怪黃嘉樂在《果欄中的江湖大嫂》飾演勇哥時，可以如此入戲了。