【果欄中的江湖大嫂】甄詠珊初出道日日捱：為咗兩個飯盒乜都做
《果欄中的江湖大嫂》入面飾演惡人菊的甄詠珊，在劇中的醜女惡人形象十分突出，連帶觀眾對她的認知率也開始推升。當然有留意開娛樂圈的應該記得甄詠珊是Freeze其中一名成員，代年傳媒稱為「整容三嬌」（其餘兩位成員分別是陳樂榣，及石泳莉），而如果以前有睇開亞視，亦會留意到甄詠珊的出現，在接受《香港01》訪問時，她說：「我喺亞視其實都多嘢做，嗰段時間比較重製作嘅節目都有搵我做，其實佢哋都好鍚我，但因為我啲私人理由所以拍咗兩個節目就無做，退出咗娛樂圈。」復出後推出過幾隻新歌，到2016年再加盟無綫，「我希望係一個轉捩點，但我就唔會奢望彈返起，我人生有個宗旨，就係只要你好努力好努力就一定有成果。」
當年她被傳出因推job而被舊公司解約，其實當中另有故事，她說：「其實我係一個唔計較嘅人，我咩job都會做，當然有個底線就係三點不露，我推過一個job就係《3D肉蒲團之極樂寶鑑》，我有個格言就係邊度有飯食就去邊度。」咁究竟係咪因為呢件事而無得續約呢？「係，都過咗去喇，都好遺憾無得同舊公司續約。我自己覺得簽咗一間公司就好似結咗婚咁，當你離開就好似離婚，但我覺得自己應該要有做人底線。同過咗咁多年，佢《玉》都好成功。最近舊公司都有搵我合作拍《向西聞記》，所以我好都好開心，當時片酬我無同佢傾，我亦都無要求，但個數字我都好滿意，分開咗七年合作返真係好開心，希望可以繼續合作。」
今次37歲的她，其實早於20年前已經加入娛樂圈，不過是由茄哩啡做起，亞視的《我和殭屍有個約會II》也有份參與，她表示：「其實我16歲就入行，好似行樓梯咁一級一級咁行上去，我係一個好有韌力嘅人，係由茄哩啡開始做起，真係好似周星馳喺《喜劇之王》入面咁，為咗兩個飯盒乜都做。」
【果欄中的江湖大嫂】無綫突然公佈首集收視 緊係因為好收先講喇
【果欄中的江湖大嫂】終於等到馮盈盈出場：希望大家唔會兼棄我！
「當年97，爸爸啱啱破產，我有父母同細佬，我嗰時養起成頭家，一個人要打幾份工，朝早去做茄哩啡，有做埋化妝，夜晚就去酒吧賣啤酒。化妝同酒吧都搵到啲嘅，茄哩啡就為理想喇，咁嘅生活差唔多過咗半年，等化妝做起咗先輕鬆啲，之後就慢慢去casting，邊度有就去邊度，到我26歲先正式入行。就算我之前復出，乜都由零開始，咪同自己講當係16歲嗰陣咁做囉。」在TVB的演出終於有人留意，說不定這就是她再次成名的開始。