【果欄中的江湖大嫂】陳煒重提「沐浴巨星」：好多紋都可以光滑晒
《果欄中的江湖大嫂》首集收視高達28.1點，成為2018年首播最高收視的劇集，能夠有此成績當然因為套劇多人睇，點解多人睇？首先上一套《火線下的江湖大佬》口碑不錯，其次便是劇中有很多搶眼的女主角，岑麗香、馮盈盈、江嘉敏等等，不過講到《果欄中的江湖大嫂》最正最重要的那位，當然是當中的大嫂陳煒喇！
點解咁搶鏡？因為煒哥在劇中閃亮的皮膚，高貴的樣貌，即使穿上果欄的服裝也難掩其氣質。不過已經44歲的煒哥，要做到咁當然有秘訣，在接受《香港01》訪問時，她說：「多謝晒，感激個燈光師，真係㗎，救到好多，唔係企喺頂燈下面已經爭好遠㗎喇個樣，要多謝燈光師喇！其實我哋開工成日日夜癲倒，無咩辦法同特別時間去保養，所以主要都係注重清潔喇，落妝好緊要，個妝要落得徹底啲，等啲皮膚有時間透氣。飲食方面都係要飲多啲水喇，煎炸嘢緊係少食喇，我自己就唔係太食加工食品，即係煙肉香腸嗰啲，腌製過嘅嘢我好少食，主要食啲新鮮嘅材料。」食加工食品已經成為香港人的習慣，因為香港樣樣都要快嘛！能夠向它say no，煒哥抵你仲保持得咁靚！
而有網民重新回味煒哥當年拍攝沐浴露的廣告，當年她有個名稱叫沐浴巨星，剩係睇個膊頭都已經滑到反晒光！煒哥將一切功勞同樣歸於燈光師：「都真係好多謝燈光師，真係化腐朽為神奇，好多紋都可以打到光滑晒呢樣係真。」
【果欄中的江湖大嫂】無綫突然公佈首集收視 緊係因為好收先講喇
當然，雖然煒哥出到「化腐朽為神奇」咁誇張，但如果自己本身皮膚實在太差，相信美圖秀秀都未必有幫助，尤其是藝人經常開夜車，究竟用咩護膚方法最好呢？「我哋當然都會注意用乜嘢產品，面膜緊係一定要喇，盡可能都唔好懶囉，一落咗妝就要敷返半個鐘。我哋真係天生食呢行飯，習慣咗呢個時間模式。如果正常人突然之間要捱一兩日，可能會好殘，但我哋已經習慣咗。」果然食得咸魚抵得渴！