雨僑戶外婚禮幸福出嫁　羅力威：希望佢家人滿意安排

3月31號除咗係紅日，大家齊齊有假放休息下之外，仲係羅力威同雨僑拉埋天窗嘅大喜日子。佢地選擇喺淺水灣舉行戶外婚禮，藍天白雲下對住海景許下一生承諾。註冊儀式過後佢地會見傳媒時，自動波咀完又咀錫足成分鐘，相當冤氣！好多人話搞婚禮新娘永遠無得瞓，不過佢地原來剛剛相反，新任羅太話：「所有嘢都係佢搞架。」

羅生羅太呢日筵開18席午宴，接受訪問時笑到見牙唔見眼：「今日唔係行傳統路線，我地係行嫁給我路線，輕快活潑開心，心花怒放feel。」新娘子身穿心型胸婚紗，腰間仲以透視設計，相當性感，威威有無事先過目㗎？「其實我覺得好靚呀！影相時嗰套咪仲性感，我接受到嘅。」
 

搞婚禮對新人來講絕對係感情大考驗，男士們經常被投訴無意見兼參與度低，咁羅力威又係咪豬隊友呢？雨僑即刻搶答話：「佢當然唔係豬隊友啦！成個婚禮都係佢負責架，我瞓得好好呀。奉勸所有將會結婚嘅新娘子，邊個book場都好，記得將場地佈置交俾你老公，咁佢就會中伏架啦，因為同Deco音響樂手攝影師等聯絡交晒俾佢煩。 」

雨僑對老公安排相當滿意，老公仔羅力威就話：「其實佢滿意就得㗎啦，亦都希望佢屋企人滿意啦。講真呢件事係用個好複雜好多心血嘅做法，令大家睇落簡單，就係最高境界啦。」

【多圖】胡杏兒御用星級影樓 雨僑羅力威森林婚照原來喺香港影

 【多圖】藝人婚照類型多元化 岑麗香陳柏宇孫慧雪各有特色

雨僑羅力威歐式喜帖曝光 經典品牌婚戒惹女士羨慕

 【補辦婚宴】吳日言古蹟擺酒 先等入會再經英文面試：比想像中難

同公司嘅容祖兒、鍾舒漫、何浩文等都有到場見証分享喜悅，拋花球儀式中佢地就將幸福拋俾陳嘉桓。雨僑表示：「呢個月好多人怕落雨潮濕天氣唔好，但我地今日真係全個月最好天嘅一日！」呢個時候羅力威搭咀話：「Sorry，係全年最好天嘅一日，係稍微熱咗兩度左右，不過真係好好天。」你地嘅大好日子，點都會係好日啦！