【多圖】胡杏兒御用星級影樓 雨僑羅力威森林婚照原來喺香港影
撰文：洪曉璇
出版：更新：
雨僑同羅力威結束8年愛情長跑，公開婚照宣佈3月擺酒結婚，除咗戥佢地開心之餘，婚紗相都相當吸睛﹗身上禮服係星級藝人贊助之餘，大家都相當好奇佢哋到底飛咗去邊度影婚照，森林景相當特別。唔使估估下啦，其實成輯相都喺影樓室內完成，仲要唔使離開香港！
Model出身嘅雨僑擺Pose絕對難佢唔到，婚紗晚裝由胡杏兒嘅公司Kevolie贊助，心型胸婚紗上繡滿立體花花及珍珠，高貴又有氣質，望真啲腰側仲有少少透視；至於晚裝方面，由於雨僑鍾情滿天星圖案，所以 see through 裸色晚裝特別加上銀色滿天星圖案設計，非常性感亮麗，至於羅力威嘅兩套男禮，就出自蘇志威嘅LUXE Tuxedo。
男士們睇衫可能無咩感覺，咁就不如睇景啦。雨僑同羅力威公開婚照中有兩個場景，一個係喺落地大窗前，配以大量滿天星佈置作背景，純潔又有氣質；而另一場景係以掛上燈泡嘅森林作為拍攝背景，充滿浪漫童話感覺。
原來兩個場景都係位於香港嘅萬呎影樓ByBen一角，攝影師Ben係婚攝界紅人，胡杏兒嘅婚紗照、大肚相都係由佢操刀。影樓中有超過20個實景場景，除咗雨僑同羅力威影嘅森林及韓式大窗，仲有法式露台、長樓梯、甚至一比一大嘅夢幻藍色馬。開業短短一年多啲已經成為明星藝人御用影樓，好似胡說八道會、蘇志威、吳業坤、鮑起靜、羅敏莊陳國邦一家、鄺文珣、吳若希等都先後喺度留影。
+2