準人妻雨僑欣賞羅力威夠真：由內到外都咁善良

雨僑與羅力威上月初公布喜訊，兩人將於本月31日舉行婚禮，待嫁的雨僑今午出席化妝品牌活動時，就透露雖然最近開始派喜帖，但其實連婚紗都未揀好。「聽日會出席婚紗展，屆時可好好參考一番，自己想以輕便為主，因為方便方動，但最終都係交畀設計師。」雨僑更預告婚紗不會太性感，因為婚禮在户外舉行，加上時間長，太性感會變為顧慮。至於玩新郎環節，雨僑亦表示未必會有，因為想婚禮一切從簡。「大部分都係佢（羅力威）安排，拋花球可能已經係最隆重一環，另外會有樂手做Live band，我到時真係個人到就得。」
雨僑表示早在4、5前已與對方有結婚共識，到正式求婚時，二人都喊到收唔到聲。「佢搵唔到我哋啲合照，所以print咗單人相出來要貼埋一齊，激死。」說時雨僑全程笑得極為甜蜜。問到羅力威最吸引的地方，雨僑又再發出陣陣甜美笑容。「真誠，喺現今世代少不免需要少少圓滑，但佢唔係好在乎呢樣嘢，做人好直接，可能會予人串嘅感覺，但佢真係好善良，由心底散發出來。」