林峯聞分手傳聞不欲多言　跟吳千語仲有聯絡：不如你哋問吓佢啦

提起PTU三個英文字母，大家即時想起的可能都是杜琪峯杜Sir的名作《PTU》，但最近英皇聯合阿里巴巴集團、YouKu開拍了超級網劇《PTU機動部隊》，而且演員陣容相當鼎盛，男女主角分別是林峯及阿Sa蔡卓妍，另外仲有方中信、張繼聰、林雪、譚耀文等，絕對星光熠熠，直達電影級。

原來林峯已經好多年冇返香港拍劇，今次仲同英皇破冰，意義十足。（梁碧玲攝）

阿峯似乎不欲多言感情事，仲叫記者問返千語本人。（梁碧玲攝）

久未在港拍劇的林峯笑言自己相隔了4、5年才再於香港拍劇，而且更是離開舊公司英皇後首次再合作。「要多謝楊生同Mani畀機會我，嚟緊都會繼續合作。」看來各峯迷不用在到內地找他了！

阿Sa突然變「擋箭牌」。（梁碧玲攝）

另外，大家都關心近日他與吳千語傳出情變的消息，問到他與對方的關係如何，他就說：「我哋仲有保持聯絡，但佢最近喺大陸拍劇仲忙過我。」再追問之下，他就說：「其實我都回應晒，不如你哋問吓佢（吳千語）啦，佢都係藝人。」似乎不欲多言。

不過當有記者問到他有沒有其他對象時，他就指自己忙拍《PTU機動部隊》，根本沒有時間及機會，笑言：「我日日都剩係對住阿Sa。」其實阿Sa都單身中，或者都有機會？