【獨步天下】林峯喊唔停勁悲傷　粉絲心痛隔Mon幫手抺眼淚

近來由林峯﹑唐藝昕主演的清裝劇《獨步天下》熱播，雖然劇集被指大量用上key頭﹑PS效果，搞到不少電視友都埋怨睇得唔過癮，不過因為有林峯的關係所在，大家只好忍耐睇落去。而隨著劇情愈來愈高潮，林峯所飾演的皇太極為了東哥（唐藝昕飾）不停講出甜言蜜語金句又喊唔停，睇到視迷不時感動又傷心，更Over到隔住Mon幫他擦眼淚，認真搞笑。

《獨步天下》成個劇情主要集中在女真部落努爾哈赤兒子們的鬥爭，與女真第一美女東哥（唐藝昕飾）身上。其中林峯飾演的皇太極與唐藝昕飾演的東哥，有一場十分可歌可泣的愛情線，令人睇到都喊唔停。就好似一場東哥飲醉酒時與皇太極訴苦的戲，林峯聽完她的說話後亦忍不住眼濕濕想喊，邊喊邊錫又邊講出甜言蜜語：「你聽好了，不管發生甚麼我皇太極絕不會拋下你。」；仲有在一場東哥受傷之後的戲，林峯聽完東哥的一翻說話之後又喊，而且眼淚仲大滴大滴咁流，虐心的表現一絕令視迷大讚好戲，有電視友更唔捂得睇到林峯喊，仲隔著Mon攞紙巾幫他擦眼淚，而且唔止一個粉絲，可想而知大家睇得幾入迷。

以為喊一兩場就完？你就大錯特錯喇！在東哥決定離他而去的一幕中，林峯又因依依不捨在雨中大喊；東哥受傷卧床不起林峯害怕她死去又喊，而且仲爆晒青筋咁喊，喊到大家都心痛不已，一連幾場戲喊喊喊算自然，好演技大家都有讚無彈「虐死」「演技太好了」「男主哭戲最多的一部劇」…話係古裝版《天國的階梯》都不為過！

林峯除了識喊之外仲好識浪漫添。一場東哥以為林峯受傷的戲中，女方擔心不已前來探望，結果又被林峯突然強吻錫錫；仲有一場林峯同唐藝昕談情說愛中，在卧床上更來個花式錫錫：「悠然，你可喜歡我這般親你。」睇到人面都紅晒。而林峯更不時在自己社交網站留言又講出甜言蜜語：「不管你是東哥還是步悠然，都是我皇太極的。」…成部劇不停表白﹑喊﹑錫錫，令大家睇到一位與眾不同的皇太極。