林峯舊班底拍住上錄新歌　「大家咁多年兄弟情，係一個心願」

​林峯闊別樂壇都已經有一段時間，對上的一首新歌已經是2016年推出的電視劇主題曲等作品。相信大家都好期待林峯作為一個歌手再次登上音樂頒獎台上。日前林峯就於微博和IG上透露自己正在拍攝新歌的MV，並且寫道：「猜一猜新MV的搭檔是誰呢？」雖然神神秘秘咁唔開名，有不少網民都猜測到相中背着鏡頭的人就是MC Jin。不過紙始終都係包唔住火，林峯今日出席活動時就開腔回應：「我啱啱就同MC Jin錄咗一隻歌。」

嘩，原來大家真係估啱咗，林峯真係同歐陽靖（MC Jin）有新歌。林峯：「首歌係for邵氏嘅某一個作品，我覺得都幾特別。因為我同MC Jin識咗幾耐，以前有啲戲劇上面合作，不過音樂上面就係第一次。今次又有鄧智偉、莊冬昕，所以我哋就當係一個re-union，所以我覺得會有啲新嘅火花。（你今次會唔會rap？）佢rap，我唱。」

其實始於2009年林峯的專輯《Let's Get Wet》開始，鄧智偉、莊冬昕就已經是其中多首歌曲的作曲監製。2009年的《Let's Get Wet》和2011年推出的《CHOK》等歌更加是唱到街知巷聞。2012年之後，鄧智偉、莊冬昕和林峯3人就沒再在音樂上合作，所以今次鄧智偉、莊冬昕、林峯和MC Jin 4位的合作，可算是他們時隔5年之後的再次合作。在《香港01》訪問中，林峯更表示：「我覺得係感動，咁多年大家兄弟情，一個心願。」

至於劇集方面，林峯表示自己尚未有回流拍港劇的打算。「我對上一套港劇係《使徒行者》，都有5,6年時間。我覺得冇所謂，對演員嚟講最緊要有好嘅劇本同有挑戰嘅角色。其實冇咩定性係咩地區，因為好多劇都係跨地區合作，演員最重要係拍到你想拍嘅嘢。」問到之前因《獨步天下》點擊破20億而要兌現承諾與張睿kiss的事，林峯帶點尷尬的說：「原來我都有潛質去演一啲未演過嘅角色同埋戲種。雖然睇返playback我都打晒冷顫，但係出嚟效果我都覺得幾好，唔礙眼。」唔知林峯會唔會因此而開發咗新嘅演戲路線呢？

另外值得一提的就是林峯與千語BB感情轉淡的傳聞。在訪問中，林峯對於「吳千語」的行蹤時顯得十分淡然。問到林峯在他的生日（12月8日）時，吳千語有沒有和他慶祝，他就只回答說：「佢喺內地拍緊一部民初戰爭片，會忙到明年2月底。」輕輕一句的帶過，再追問下去時，他就表示不想多提感情事。睇嚟聖誕節林峯都係要「lonely lonely Christmas」啦。