【一圈圈】杜汶澤再談染罕見怪病 自稱感覺好自在：無咩嘢好擔心
上月底杜汶澤到商台接受《一圈圈》主持人梁泰來（Terry）的訪問，除了提及與吳君如不和傳聞外，其實都有講返2012年阿澤感染罕見怪病「米勒費雪症候群」當時的情況，緩和一下之前尷尬的氛圍。Terry講提起早前與田蕊妮訪問提及此事就講到喊，因為自己好不知所措。阿澤就透露當時的感覺好自在，「因為你都死，人都要死，咁無咩嘢好擔心係咪先。」
Terry之後提到可能有機會離開老婆田蕊妮，阿澤直言無辦法，「始終有一日會離開佢係咪先，人有咩好得過死，睇下點死咋嘛。唔係睇你一個人點死，而係睇下一個人在生做過啲咩。咁邊個唔洗離開，你同我都要離開，始終有一日走嘅時候好多人唔捨得，咁結果又係點樣。都係毫無選擇咁離開，咁點解唔欣然面對呢？係一個心態上轉變。」對於死亡阿澤真係睇得好開，「阿田都擔心，所以之後佢媽媽走都係咁面對。所以生老病死早啲識好過遲啲識，呢啲係每個人會面對同經歷嘅歷程。」
阿澤透露當年醫生同自己講，這種病需要2-3年才能治愈，有一段時間不能離開屋企，「可能要換血，但佢就唔prefer咁做，佢知道我一路都有打坐，佢就上網search發現原來打坐對免疫系統有好處，好似reboot機，返這原本的狀態，打打下又好返。」他指當時只需要2-3嗰星期就治愈，醫生大讚是奇跡。咁同太太田蕊妮的關係有無因此而變得更加好？阿澤就話，「每日都有經歷，都有唔同改變，唔係點解會話做生不如做熟，好似你入電台做，日日啲嘢都重複，但你隨著時間耐左就有好多唔同感情產生，就算中間有考驗，到最後你都會發覺，無嘢可以贏到時間。我意思人與人之間時間耐左嘅關係，一定係越熟嘅朋友越好。」
其後Terry就話每逢結婚週年或者太太生日，大讚阿澤都會悉心炮製好sweet嘅事件，阿澤聽完就直言，「溝女係咁架喇。你要keep住溝架嘛。出唔到去溝咪返屋企溝自己老婆。」他笑言出去溝女無人騷自己，「兩個人一齊要保持住新鮮嘅感覺，你都要諗一個辦法佢開心，因為佢開心你先有好日子過。（係咪因為你將財政交俾對方打理？）嗰陣係簽英皇之前已經講好左，我係寰亞走無晒錢，簽英皇就有錢，佢就話，（唔好講咁多，全部俾晒啲錢我）我每個月出返15000蚊比你，到而家1蚊都無加過，佢自己啲股票係咁升，由嗰下開始我就變無產階級，一路到而家。」最後阿澤仲要話因為當時太太田蕊妮無工作，唯有可以做的就是睇住啲錢，好似看更咁。