【一圈圈】杜汶澤爆seed有片睇 明窒主持梁泰來：你真係好懷舊喎
出名敢言的杜汶澤上月底就為親自執導的電影《空手道》到商台接受《一圈圈》主持人梁泰來（Terry）的訪問，完結訪問後阿澤就在FB開post大鬧對方重提他與劉德華、吳君如的不和舊傳聞，感到非常不受尊重，最後仲寫「錄左唔播正契弟」的hashtag 。《空手道》上映兩星期，《一圈圈》今日(12日)下午先播出訪問，期間更將令阿澤大動肝火的訪問錄音放上其facebook page，有網友就留言問訪問是否足本播放。
訪問一開始，梁泰來先介紹阿澤的背景，期間更以，「但有指他因為口不擇言，得罪人而導致事業走下坡。2014年因為支持台灣太陽花學運，而被內地封殺。」入到正題，Terry就話 :「你終於有戲上喇！你明唔明點解我咁講呀？杜汶澤.....」阿澤聽完就話 :「我都唔明邊嗰明。（你呢幾年好難有電影上？）我呢幾年好少拍戲，有嘢做已經算偷笑，邊好似你咁日日都有工返，幾好呀。我見到你都戥你高興，點諗到。」之後話題都繼續圍繞住《空手道》，言談甚歡。
點知話題一轉就講到阿澤2002年憑《無間道》「傻強」一角贏到好多掌聲同獎項，但到2006年大眾都覺得阿澤因為言論過火得罪人，令到無咗好多嘢，就問對方會否覺得是一個轉折位？阿澤聽完之後就講了一句，「係呀！」之後就放聲大笑，在旁的梁泰來見狀後都一齊大笑並繼續表示有傳聞指阿澤曾得罪過劉德華，吳君如及杜琪峰，再問阿澤是否真有其事？他就望住梁泰來話，「你真係好懷舊喎你，我發覺你好鍾意問埋上一代嘅問題。呢啲嘢我唔想答你喎。」接下來氣氛開始緊張，因為梁泰來再繼續追問吳君如對自己事業影響好大？阿澤直言，「吳君如對事業影響大，咁點？(會唔會覺得咁樣唔好？)點樣唔好？你好似知咁樣，你知唔知呀？（咁而家關係點樣？）我做咩要講俾你知，我同佢關係點點解要話你知，係咯。」之後就一度dead-air，他續道，「一定要講嘅咩？呢度差館呀?」梁泰來聞言後相當尷尬，阿澤再補多刀：「係咪無諗過呢？你覺得問咩我都會答咁下嘛。」