杜汶澤不滿DJ重提劉德華恩怨　向商台開火：你估我咩都要答你咩？

杜汶澤出晒名敢言，今日Facebook佢又開腔喇，事緣佢早前上咗商業電台錄訪問，相信當時嘅主持人問咗一啲極久年代之前嘅問題，就係例如阿澤口中所說嘅「究竟你同劉德華吳君如唔啱，係咪真咖？」立即就惹來阿澤嘅不滿，事關呢件事真係好耐以前嘅事，當年傳出因為阿澤口不擇言而得罪華仔，令到本來十分好朋友的他們決裂，仲將阿澤趕出當年租給他的加多利山布力架街豪宅，不過之後阿澤出席劉德華的演唱會做嘉賓時已經澄清過，證明大家係無事嘅。主持人無喇喇又走去舊事重提，難怪阿澤會咁嬲喇。

至於吳君如，當年佢哋兩個人做商台的《嘩嘩嘩打到黎》就最好朋友，阿澤結婚時君如都有去伴娘，劉德華就做伴郎。不過當時就有傳阿澤喺背後話君如生仔無屎忽而反面，不過其實都無證實過真偽，而阿澤亦公開否認不和。今次當事人選擇唔答呢啲問題，仲話自己唔會因為套戲要宣傳所以就乜都要答你。眾所周知，阿澤雖然好敢言，不過而家個人都好有原則，的確唔會靠呢啲嘢去做宣傳。好多人都估究竟今次係邊個DJ呢？好多人就估係節目《一圈圈》入面嘅梁泰來或者阮兆祥，不過暫時都未有答案，但阿澤無因為商台而俾面佢，仲話：「莫講話你個台家陣少人聽吖，多人聽我都未驚你呢！」希望阿澤出咗啖氣會無咁嬲喇！