【嫁到這世界邊端】港女嫁去阿布扎比 劏房都500呎 戥港人悲哀
中東國家喺香港人心目中係神秘嘅國度，好多文化差異同埋規矩可能估都估唔到！喺香港結婚嫁老公可能要父母批准、朋友幫眼，但係喺另一個國度原來問下神就搞掂，神話yes就yes，神say no就good bye。
好似盲婚啞嫁？但有另類着數喎！尋晚《嫁到這世界邊端》嘅港女Laila嫁到去阿聯酋首都阿布扎比，雖然住劏房，但係劏房實用面積都有500呎，包埋水電都只係月租港幣8千，Laila帶主持陳貝兒參觀屋企時就話住得好舒服，而且覺得香港人好悲哀。
今年42歲的Laila移居阿布扎比已經12年，同老公Assad育有10歲女兒Aisha，Laila原本在香港做珠寶設計同銷售員，一次阿聯酋的公司邀請她搞珠寶展覽，就認識了Assad，Assad幫她搞簽證、搞手續等發展成情侶，Laila坦言嫁過去之前對阿布扎比甚至杜拜完全陌生，過到去才知道生活同文化有好多大差異，但Laila表示她的家人好放心：「佢哋話終於嫁得出喇，唔使做剩女喇！」
作為伊斯蘭教國家當然好多規矩，例如女性的身體只能夠畀家人同埋老公欣賞，所以在公眾場合一定要包到實同埋戴頭巾，結婚前要求阿拉神指引，獲得神准許才可以結婚，Laila就係咁嫁咗俾Assad，仲跟老公信奉了伊斯蘭教添。陳貝兒則有感而發：「原來有啲嘢係我複雜化咗！如果簡單啲、直接啲，會唔會可以好似佢咁，幸福嚟得容易啲、簡單啲呢？」不知是否又諗起自己的婚姻呢！
Laila同老公住在劏房，吓！阿布扎比都有劏房？Laila就帶陳貝兒去參觀她的家，Laila話阿布扎比業主是參考中國的劏房，將間屋分租畀租客，之但係人哋地方咁大，所謂劏房其實實用面積都有成500呎，有廳有房有廚房有睡房只係月租港幣8千，分分鐘大過香港啲私人樓，陳貝兒睇見個廁所都大過香港成間劏房就話：「如果8千幾蚊喺香港可能剩係租到你個廁所咋。」Laila都有同感：「作為一個香港人覺得好悲哀！」睇到呢度好多香港人應該好羨慕。