【嫁到這世界邊端】婆媳問題世界大同　陳貝兒見識德國霸道奶奶

幸福的婚姻生活除了要有個好老公，其實有個好奶奶都好重要。結婚從來不是兩個人的事，婆媳關係幾乎是所有已婚女性都要面對的問題，而婆媳問題更是千古永恆的難題。別以為這個現象只會存在於華人社會，在昨晚剛播出的無綫節目《嫁到這世界邊端》第二集，就話畀大家知其實婆媳問題根本是世界大同的，基本上有奶奶同有新抱嘅存在，就有婆媳問題，就算嫁到德國都一樣。如果你奶奶或者新抱同你好friend，關係好好，我真係恭喜你呀！

第二集講主持陳貝兒同嫁到德國的港女人妻卡菲去探望卡菲的老爺奶奶，當卡菲老爺奶奶一見到陳貝兒就熱烈歡迎又送上擁抱，仲同香港的觀眾飛吻say hello，以為奶奶好nice好易相處？少年你太年輕喇。鏡頭一轉就講卡菲形容她奶奶外形似企鵝，好彩她奶奶聽唔到。之後陳貝兒同卡菲就開始揭露奶奶的霸氣真面目，陳貝兒話：「她奶奶是性格巨星，神情表露無遺，生氣就生氣，開心就開心，罵你就罵你。」卡菲就話：「奶奶說話很粗獷，『喂.....做』，『不可以』，『我們必須怎樣怎樣...』其實她跟我說，我就會做，你唔使吠我呀，真係...」而卡菲亦自知自己性格火爆，獅子座的她遇上同樣獅子座的奶奶，自然容易火星撞地球，也好明白她老公Markus夾在中間做磨心的慘況。

最嚴重一次是兩婆媳因為搬屋鬧翻了，互不相見幾個月。卡菲的奶奶「指揮」住卡菲要點搬屋，令卡菲終於爆發：「我好大壓力，那一刻我不禁大叫，我呢世人從未試過發咁大脾氣，我大叫完仲瞓喺地度，當堂嚇親他們。」不過奶奶幾個月後竟然主動氹返卡菲，令她暖在心頭。嫁到異鄉的卡菲亦已經當咗老爺奶奶是她另一對父母。其實卡菲明白要她的德國奶奶接受一個香港女子不是易事，而奶奶亦明白卡菲放棄香港的一切嫁到德國生活會很艱難，只要婆媳之間多些體諒，自然可以化解唔少問題。